« Ad Deum Unum et Trinum »

O Sanctíssima Trínitas, adóro te habitántem per grátiam tuam in ánima mea.
O Sanctíssima Trínitas, hábitans per grátiam tuam in ánima mea, fac ut magis ac magis amem te.
O Sanctíssima Trínitas, hábitans per grátiam tuam in ánima mea, magis magísque sanctífica me.

Mane mecum, Dómine, sis verum meum gáudium.

Actus Caritátis

Dómine Deus, amo te super ómnia et próximum meum propter te, quia tu es summum, infinítum, et perfectíssimum bonum, omni dilectióne dignum. In hac caritáte vívere et mori státuo. Amen.

Actus Fídei, Spei et Caritatis

Deus meus, credo in Te, spero in Te, amo Te super ómnia ex tota ánima mea, ex toto corde meo, ex totis víribus meis: amo te quia es infiníte bonus et dignus qui améris; et quia amo Te, me pænitet ex toto corde te offendísse: miserére mihi peccatóri. Amen.

In Te credo, in Te spero, Te amo, Te adóro, beáta Trínitas unus Deus, miserére mei nunc et in hora mortis meæ et salva me.

Omnípotens sempitérnæ Deus, da nobis fídei, spei et caritátis augméntum; et, ut mereámur ássequi quod promíttis, fac nos amáre quod præcipis. Per Christum Dóminum nostrum. Amen.

Actus Fídei

Dómine Deus, firma fide credo et confíteor ómnia et síngula quæ sancta Ecclésia Cathólica propónit, quia tu, Deus, ea ómnia revelásti, qui es ætérna véritas et sapiéntia quæ nec fállere nec falli potest. In hac fide vívere et mori státuo. Amen.

Actus Spei

Dómine Deus, spero per grátiam tuam remissiónem ómnium peccatórum, et post hanc vitam ætérnam felicitátem me esse consecutúrum: quia tu promisísti, qui es infiníte potens, fidélis, benígnus, et miséricors. In hac spe vívere et mori státuo. Amen.

Fiat, adimpleátur

Fiat, adimpleátur, laudétur et in ætérnum superexaltétur iustíssima atque amabilíssima Volúntas Dei super omnia. Amen. Amen.

Doce me, Dómine, fácere voluntátem tuam, quia Deus meus es Tu.

Gratiarum actio S. Augustini

(Conf. I, 20, 31)

Grátias tibi, dulcédo mea et honor meus et fidúcia mea. Deus meus, grátias tibi de donis tuis; sed tu mihi ea serva. Ita enim servábis me, et augebúntur et perficiéntur quæ dedísti mihi, et ero ipse tecum, quia et ut sim tu dedísti mihi.

Invocatio Ss.mæ Trinitatis

Omnipoténtia Patris, ádiuva fragilitátem meam, et e profúndo misériæ éripe me.

Sapiéntia Fílii, dírige cogitatiónes, verba et actiónes meas omnes.

Amor Spíritus Sancti, esto cunctárum ánimæ meæ operatiónum princípium, quo iúgiter sint divíno beneplácito confórmes.

Symbolum Athanasianum

Antíphona: Gloria tibi, Trinitas æquális, una Déitas, et ante omnia sæcula, et nunc, et in perpétuum (T.P. Allelúia).
¹ Quicumque vult salvus esse, * ante omnia opus est, ut teneat catholicam fidem.
² Quam nisi quisque íntegram inviolatámque serváverit, * absque dúbio in ætérnum períbit.
³ Fides autem catholica hæc est: * ut unum Deum in Trinitáte, et Trinitátem in unitáte venerémur.
⁴ Neque confundéntes persónas,* neque substántiam separántes.
⁵ Alia est enim persóna Patris, ália Fílii, * ália Spíritus Sancti.
⁶ Sed Patris, et Fílii, et Spíritus Sancti una est divínitas, * æquális glória, coætérna maiéstas.
⁷ Qualis Pater, talis Fílius,* talis Spíritus Sanctus.
⁸ Increátus, Pater, increátus Fílius, increátus Spíritus Sanctus.
⁹ Imménsus Pater, imménsus Fílius, * imménsus Spíritus Sanctus.
¹⁰ Ætérnus Pater, ætérnus Fílius, ætérnus Spíritus Sanctus.
¹¹ Et tamen non tres ætérni, * sed unus ætérnus.
¹² Sicut non tres increáti, nec tres imménsi, * sed unus increátus, et unus imménsus.
¹³ Simíliter omnípotens Pater, omnípotens Fílius, * omnípotens Spíritus Sanctus.
¹⁴ Et tamen non tres omnipoténtes, * sed unus omnípotens.
¹⁵ Ita Deus Pater, Deus Fílius, * Deus Spíritus Sanctus.
¹⁶ Et tamen non tres Dii, * sed unus est Deus.
¹⁷ Ita Dóminus Pater, Dóminus Fílius, * Dóminus Spíritus Sanctus.
¹⁸ Et tamen non tres Dómini, * sed unus est Dóminus.
¹⁹ Quia, sicut singillátim unamquámque persónam Deum ac Dóminum confitéri christiána veritáte compéllimur: * ita tres Deos aut Dóminos dícere cathólica religióne prohibémur.
²⁰ Pater a nullo est factus: * nec creátus, nec génitus.
²¹ Fílius a Patre solo est: * non factus, nec creátus, sed génitus.
²² Spíritus Sanctus a Patre et Fílio: * non factus, nec creátus, nec génitus, sed procédens.
²³ Unus ergo Pater, non tres Patres: unus Fílius, non tres Fílii: * unus Spíritus Sanctus, non tres Spíritus Sancti.
²⁴ Et in hac Trinitáte nihil prius aut postérius, nihil maius aut minus: * sed totæ tres persónæ coætérnæ sibi sunt et coæquáles.
²⁵ Ita ut per ómnia, sicut iam supra dictum est, * et únitas in Trinitáte, et Trínitas in unitáte veneránda sit.
²⁶ Qui vult ergo salvus esse, * ita de Trinitáte séntiat.
²⁷ Sed necessárium est ad ætérnam salútem, * ut Incarnatiónem quoque Dómini nostri Iesu Christi fidéliter credat.
²⁸ Est ergo fides recta ut credámus et confiteámur, * quia Dóminus noster lesus Christus, Dei Fílius, Deus et homo est.
²⁹ Deus est ex substantia Patris ante sæcula génitus: * et homo est ex substántia matris in sæculo natus.
³⁰ Perféctus Deus, perféctus homo: * ex ánima rationáli et humána carne subsístens.
³¹ Æquális Patri secúndum divinitátem: * minor Patre secúndum humanitátem.
³² Qui, licet Deus sit et homo,* non duo tamen, sed unus est Christus.
³³ Unus autem non conversióne divinitátis in carnem: * sed assumptióne humanitátis in Deum.
³⁴ Unus omníno, non confusióne substántiæ, * sed unitáte persónæ.
³⁵ Nam sicut ánima rationális et caro unus est homo: * ita Deus et homo unus est Christus.
³⁶ Qui passus est pro salute nostra: descéndit ad ínferos: * tértia die resurréxit a mórtuis.
³⁷ Ascéndit ad cælos, sedet ad déxteram Dei Patris omnipoténtis: * inde ventúrus est iudicáre vivos et mórtuos.
³⁸ Ad cuius advéntum omnes hómines resúrgere habent cum corpóribus suis: * et redditúri sunt de factis própriis ratiónem.
³⁹ Et qui bona egérunt ibunt in vitam ætérnam: * qui vero mala, in ignem ætérnum.
⁴⁰ Hæc est fides cathólica, * quam nisi quisque fidéliter firmitérque credíderit, salvus esse non póterit.

V/. Glória Patri, et Fílio, et Spirítui Sancto.
R/. Sicut erat in principio, et nunc, et semper, et in sáecula sæculórum. Amen.

Antíphona: Glória tibi, Trínitas æquális, una Déitas, et ante ómnia sæcula, et nunc, et in perpétuum (T.P. Allelúia).

V/. Dómine, exáudi oratiónem meam.

R/. Et clamor meus ad te véniat.

Sacerdos addit:

V/. Dóminus vobíscum.
R/. Et cum spíritu tuo.

V/. Oremus: Omnípotens sempitérne Deus qui dedísti fámulis tuis, in confessióne veræ fídei, ætérnæ Trinitátis glóriam agnóscere, et in poténtia maiestátis adoráre unitátem: quæsumus, ut, eiúsdem fídei firmitáte, ab ómnibus semper muniámur advérsis. Per Dóminum nostrum Iesum Christum Fílium tuum, qui Tecum vívit et régnat in unitáte Spíritus Sancti Deus, per ómnia sæcula sæculórum.

R/. Amen.

Te Deum

Hymnus Ambrosianus

Te Deum laudámus: te Dóminum confitémur.

Te ætérnum Patrem, omnis terra venerátur.

Tibi omnes ángeli, tibi cæli, et univérsæ potestátes.

Tibi chérubim et séraphim incessábili voce proclámant:

Sanctus, Sanctus, Sanctus Dóminus Deus Sábaoth.

Pleni sunt cæli et terra maiestátis glóriæ tuæ.

Te gloriósus Apostolórum chorus,

Te prophetárum laudábilis númerus,

Te mártirum candidátus láudat exércitus.

Te per orbem terrárum sancta confitétur Ecclésia:

Patrem imménsæ maiestátis,

Venerándum tuum verum et únicum Fílium:

Sanctum quoque Paráclitum Spíritum.

Tu rex glóriæ, Christe.

Tu Patris sempitérnus es Fílius.

Tu, ad liberándum susceptúrus hóminem, non horruísti Vírginis úterum.

Tu, devícto mortis acúleo, aperuísti credéntibus regna cælórum.

Tu ad déxteram Dei sedes in glória Patris.

Iudex créderis esse ventúrus.

Sequens versus dicitur flexis genibus.

Te ergo quæsumus, tuis fámulis súbveni, quos pretióso sánguine redemísti.

ætérna fac cum Sanctis tuis in glória numerári.

Salvum fac pópulum tuum, Dómine, et bénedic hereditáti tuæ.

Et rege eos, et extólle illos usque in ætérnum.

Per síngulos dies benedícimus te;

Et laudámus nomen tuum in sæculum, et in sæculum sæculi.

Dignáre, Dómine, die isto sine peccáto nos custodíre.

Miserére nostri, Dómine, miserére nostri.

Fiat misericórdia tua, Dómine, super nos, quemádmodum sperávimus in te.

In te, Dómine, sperávi: non confúndar in ætérnum.

Benedíctus es, Dómine, Deus Patrum Nostrorum
Et laudábilis, et gloriosus in sæcula.

Benedicámus Patrem, et Fílium cum Sancto Spíritu.
Laudémus, et superexaltémus eum in sæcula.

Benedíctus es, Dómine, in firmaménto cæli.
Et laudábilis, et gloriósus et superexaltátus in sæcula.

Bénedic, ánima mea, Dómino.
Et noli oblivisci omnes retributiones eius.

Dómine, exáudi oratiónem meam.
Et clamor meus ad te véniat.

Sacerdotes addunt:

Dóminus vobíscum.
Et cum spíritu tuo.

Orémus: Deus, cuius misericórdiæ non est númerus, et bonitátis infinítus est thesáurus: piísimæ Maiestáti tuæ pro collátis donis grátias ágimus, tuam semper cleméntiam exorántes; ut, qui peténtibus postuláta concédis, eósdem non déserens, ad præmia futúra dispónas.

Deus, qui corda fidélium Sancti Spíritus illustratióne docuísti: da nobis in eódem Spíritu recta sápere; et de eius semper consolatióne gaudére.

Deus, qui néminem in te sperántem nímium afflígi permíttis, sed pium précibus præstas audítum: pro postulatiónibus nostris, votísque suscéptis grátias ágimus, te piísime deprecantes; ut a cunctis semper muniámur advérsis. Per Christum Dóminum nostrum. Amen.

Trisagium Angelicum

In nómine Patris et Fílii et Spíritus Sancti. Amen.

Dómine, lábia mea apéries.
Et os meum annuntiábit láudem tuam.

Deus, in adiutórium meum inténde.
Dómine, ad adiuvándum me festína.

Glória Patri...
Sicut erat in princípio...

Recitatio Decas

Ad recitationem decadis, cum in communi fit, sic proceditur: primo, omnes simul deprecationem "Sanctus Deus" dicunt; postea, modo consueto, a sacerdote (vel ab eo qui preces moderatur) ceterisque utraque pars orationis dominicæ alternatur; qua finita, sequentes versus nonies alternatim repetuntur, sacerdote (vel eo qui preces moderatur) "Tibi laus" recitante et omnibus "Sanctus" respondentibus; denique, expleta decade, doxologia minor "Gloria Patri", ut de more, subiungitur.

Sanctus Deus, Sanctus fortis, Sanctus immortális, miserére nobis.

Pater noster...

Tibi laus, Tibi glória, Tibi gratiárum áctio in sæcula sempitérna, o Beáta Trínitas!
Sanctus, Sanctus, Sanctus Dóminus Deus exercítuum. Pleni sunt cæli et terra gloria tua.

Glória Patri...
Sicut erat...

Aliæ duæ decades eodem modo dicuntur, incipiendo a verbis "Sanctus Deus", etc.

Expleta ultima decade, si in communi recitetur, ab omnibus simul dicitur sequens:

Antiphona. Te Deum Patrem ingénitum, te Fílium unigénitum, te Spíritum Sanctum Paráclitum, sanctam et indivíduam Trinitátem, toto corde et ore confitémur, laudámus atque benedícimus: Tibi glória in sæcula.

Benedicámus Patrem, et Fílium cum Sancto Spíritu.
Laudémus et superexaltémus eum in sæcula.

Oremus: Omnípotens sempitérne Deus, qui dedísti fámulis tuis in confessióne veræ fídei, ætérnæ Trinitátis glóriam agnóscere, et in poténtia maiestátis adoráre Unitátem; quæsumus, ut eiúsdem fídei firmitáte, ab ómnibus semper muniámur adversis. Per Chrístum Dóminum nóstrum.
Amen.

Absoluta oratione, omnes addunt:

Líbera nos, salva nos, vivífica nos, o Beáta Trínitas!

Ad Deum Patrem

Dómine sancte, Pater omnípotens

Dómine sancte, Pater omnípotens, ætérne Deus, propter tuam largitátem et Fílii tui, qui pro me sustínuit passiónem et mortem, et Matris eius excellentíssimam sanctitátem, atque ómnium Sanctórum mérita, concéde mihi peccatóri, et omni tuo benefício indígno, ut te solum díligam, tuum amórem semper sítiam, benefícium passiónis contínuo in corde hábeam, meam misériam recognóscam, et ab ómnibus conculcári et contémni cúpiam; nihil me contrístet nisi culpa. Amen.

O Pater misericordiarum

O Pater misericordiárum, fons omnis boni, te supplex exóro per sacratíssimum tuíque amantíssimum Cor Iesu dilectíssimi Fílii tui, Dómini et Redemptóris nostri, in quo tibi semper bene compláces, dignáre concédere mihi grátiam vivæ fídei, firmæ spei et ardéntis caritátis erga te et próximum meum: ínsuper grátiam vere doléndi de ómnibus peccátis meis una cum firmíssimo propósito te in pósterum numquam offendéndi; ut secúndum divínum beneplácitum tuum semper vívere, voluntátem tuam sanctísssimam corde magno et ánimo volénti in ómnibus adimplére, et in amóre tuo usque ad finem vitæ meæ perseveráre váleam. Amen.

Ad Deum Filium

Actus dedicationis Humani Generis Iesu Christo Regi

Modificado y aprobado por el papa San Juan XXIII

Iesu dulcíssime, Redémptor humáni géneris, réspice nos ante conspéctum tuum humíllime provolútos. Tui sumus, tui esse vólumus; quo autem tibi coniúncti fírmius esse possímus, en hódie sacratíssimo Cordi tuo se quisque nostrum sponte dédicat. Te quidem multi novére nunquam; te, spretis mandátis tuis, multi repudiárunt. Miserére utrórumque, benigníssime Iesu, atque ad sanctum Cor tuum rape univérsos. Rex esto, Dómine, nec fidélium tantum qui nullo témpore discessére a te, sed étiam prodigórum filiórum qui te reliquérunt: fac ut domum patérnam cito répetant, ne miséria et fame péreant. Rex esto eórum, quos aut opiniónum error decéptos habet, aut discórdia separátos, eósque ad portum veritátis atque ad unitátem fídei révoca, ut brevi fiat unum ovíle et unus pastor. Largíre, Dómine, Ecclésiæ tuæ secúram cum incolumitáte libertátem; largíre cunctis géntibus tranquillitátem órdinis; pérfice, ut ab utróque terræ vértice una résonet vox: Sit laus divíno Cordi, per quod nobis parta salus: ipsi glória et honor in sæcula. Amen.

Ad SS. Cor Iesu

Cor Iesu sanctíssimum, large, quæsumus, effúnde tuas benedictiónes super sanctam Ecclésiam, super Summum Pontíficem, et super omnem clerum; da iustis perseverántiam, convérte peccatóres, illúmina infidéles, bénedic nostros propínquos, amícos et benefactóres, assíste moribúndis, líbera ánimas in purgatório degéntes, et super ómnium corda dulce impérium tui amóris exténde. Amen.

Ad te venio

Ad te vénio, Iesu. Tu es via, per quam incédere volo, óbsequens mandátis et consíliis et exémplis tuis teque pérsequens per sémitan obœdiéntiæ et renuntiatiónis et sacrifícii, quæ in cælum ad te condúcit.

Iesu, tu es véritas. Tu es lux vera, quæ illúminat omnem hóminem veniéntem in hunc mundum. Credo in te, credóque evangélio tuo. Cúpio te cognóscere, ut et díligam. Agam, ut cognoscáris et diligáris.

Iesu, tu es vita, per grátiam tuam sanctificántem, quæ est vita animárum nostrárum; per verba tua, quæ sunt verba vitæ ætérnæ; per Eucharístiam tuam, quæ est panis vivus, qui de cælo descéndit; per Cor tuum, quod est fons vitæ síngulis animábus et societátibus.

Tota ánima mea adhæreo verbo tuo; esúrio panem vivum Eucharístiæ tuæ; apério totum cor meum vivíficis cordis tui effusiónibus; íntime me únio ómnibus eius voluntátibus.

Utinam divínum cor tuum regnet super cunctos Ecclésiæ filios universúmque genus humánum! Amen.

Concede nos

Concede nos fámulos tuos, quæsumus, Dómine Deus, perpétua mentis et córporis sanitáte gaudére; et, gloriósa Beátæ Maríæ semper Vírginis intercesióne, a præsénti liberári tristítia et ætérna pérfrui lætítia. Per Christum Dóminum nostrum. Amen.