De sanctis • Communia • Votivae • Ad diversa • Defunctorum

  In exequiis 

  A. Extra Tempus Pascale

Ant. ad introitum

Requiem aeternam dona eis, Domine, et lux perpetua luceat eis.

Collecta

Deus, Pater omnipotens, cuius Filium mortuum fuisse et resurrexisse fides nostra fatetur, concede propitius, ut hoc mysterio famulus tuus N., qui in illo dormivit, per illum resurgere laetetur.
Vel: Deus, cui proprium est misereri semper et parcere, te supplices exoramus pro famulo tuo N., quem (hodie) ad te migrare iussisti, ut, quia in te speravit et credidit, concedas eum ad veram patriam perduci, et gaudiis perfrui sempiternis.

Super Oblata

Pro famuli tui N. salute hostias tibi, Domine, suppliciter offerimus tuam clementiam deprecantes, ut, qui Filium tuum pium Salvatorem esse non dubitavit, misericordem Iudicem inveniat.

Ant. ad communionem

Lux aeterna luceat eis, Domine, cum Sanctis tuis in aeternum, quia pius es. Requiem aeternam dona eis, Domine, et lux perpetua luceat eis, cum Sanctis tuis in aeternum, quia pius es.

Post communionem

Domine Deus, cuius Filius in sacramento Corporis sui viaticum nobis reliquit, concede propitius, ut per hoc frater noster N. ad ipsam Christi perveniat mensam aeternam.

  B. Extra Tempus Pascale

Ant. ad introitum

Aperiat ei Dominus paradisi ianuam, ut ad illam patriam revertatur, ubi mors non est, ubi aeternum gaudium perseverat.

Collecta

Deus, misericordia peccatorum et tuorum beatitudo Sanctorum, da, quaesumus, famulo tuo N., cuius depositionis (hodie) officia humanitatis persolvimus, cum electis tuis beati muneris portionem, ut eum, a mortalitatis nexibus absolutum, in die resurrectionis ante faciem tuam praesentari concedas.
Vel: Deus, qui posuisti praesentis vitae terminum, ut aeternitatis reseres introitum, te supplices deprecamur, ut nomen famuli tui N. in libro vitae miserationis tuae gratia iubeas conscribi.

Super Oblata

Adesto, Domine, quaesumus, pro famulo tuo N., cuius in die depositionis hoc sacrificium tibi placationis offerimus, ut, si qua ei peccati macula inhaesit aut vitium humanum infecit, dono tuae pietatis indulgeas et abstergeas.

Ant. ad communionem

Salvatorem exspectamus Dominum nostrum Iesum Christum, qui reformabit corpus humilitatis nostrae configuratum corpori claritatis suae.

Post communionem

Praesta, quaesumus, omnipotens Deus, ut famulus tuus N., qui (hodie) de hoc saeculo migravit, his sacrificiis purgatus et a peccatis expeditus, resurrectionis suscipiat gaudia sempiterna.

  A. Tempore Pascali

Ant. ad introitum

Sicut Iesus mortuus est et resurrexit, ita et Deus eos qui dormierunt per Iesum adducet cum eo. Et sicut in Adam omnes moriuntur, ita et in Christo omnes vivificabuntur, alleluia.

Collecta

Preces nostras, quaesumus, Domine, benignus exaudi, ut, dum extollitur nostra fides in Filio tuo a mortuis suscitato, in famuli tui N. praestolanda resurrectione spes quoque nostra firmetur.
Vel: Deus, qui per finem praesentium principia pandis futurorum, praesta, quaesumus, ut anima famuli tui N. ad redemptionis aeternae perveniat, te ducente, consortium.

Super Oblata

Nostris, Domine, propitiare muneribus, ut famulus tuus N. assumatur in gloriam cum Filio tuo, cuius magno pietatis iungimur sacramento.

Ant. ad communionem

Ego sum resurrectio et vita, dicit Dominus. Qui credit in me, etiam si mortuus fuerit, vivet; et omnis, qui vivit et credit in me, non morietur in aeternum, alleluia.

Post communionem

Praesta, quaesumus, Domine, ut famulus tuus N. in mansionem lucis transeat et pacis, pro quo paschale celebravimus sacramentum.

  D. Alii orationes pro Missa exequiali

Collecta

Deus, cui soli competit vitam post mortem praestare, libera famulum tuum N. ab omnibus peccatis, ut, qui Christi tui resurrectionem credidit, tempore resurrectionis gloriosus tibi iungatur.

Super Oblata

Omnipotens et misericors Deus, his sacrificiis ablue, quaesumus, famulum tuum N. a peccatis suis in sanguine Christi, ut, quem mundasti aqua baptismatis, indesinenter purifices indulgentia pietatis.

Post communionem

Sumpto sacramento Unigeniti tui, qui pro nobis immolatus resurrexit in gloria, te, Domine, suppliciter exoramus pro famulo tuo N., ut, paschalibus mysteriis mundatus, futurae resurrectionis munere glorietur.
  In exequiis parvulorum 

  E. In exsequiis parvuli baptizati 1

Ant. ad introitum

Venite, benedicti Patris mei, dicit Dominus: percipite regnum, quod vobis paratum est ab origine mundi (T.P. Alleluia).

Collecta

Clementissime Deus, qui sapientiae tuae consiliis hunc parvulum, in ipso vitae limine, ad te vocasti, preces nostras benignus exaudi, et praesta, ut cum ipso, quem baptismatis gratia adoptionis tibi filium effecisti, et in regno tuo iam credimus commorari, nos etiam aeternae vitae tribuas esse aliquando consortes.

Super Oblata

Haec munera tibi, Domine, oblata sanctifica, ut, quem parentes a te donatum tibi reddunt infantem, ipsum laeti in regno tuo mereantur amplecti.

Ant. ad communionem

Consepulti cum Christo per baptismum in mortem, credimus quia simul etiam vivemus cum Christo (T.P. Alleluia).

Post communionem

Corporis, Domine, et Sanguinis Filii tui communione percepta, te fideliter deprecamur, ut, quos in spem vitae aeternae sacris dignatus es nutrire mysteriis, in huius tribuas vitae maeroribus confortari.

  E. In exsequiis parvuli baptizati 2 Aliae orationes

Collecta

Deus, qui maerore scis corda nostra comprimi propter huius infantis excessum, praesta, ut, quem iam hac vita defunctum, te disponente, deflemus, aeternam in caelo sedem credamus adeptum.

Super Oblata

Hanc oblationem, Deus, dignare in nostrae signum devotionis excipere, ut, qui tuae providentiae consiliis submittimur confidentes, tuae quoque pietatis dulcedine sublevemur.

Post communionem

Divino munere satiati, te, Domine, deprecamur, ut, qui hunc infantem ad mensam tribuis regni caelestis accumbere, eandem et nos participare concedas.

  F. In exsequiis parvuli nomdum baptizati

Ant. ad introitum

Absterget Deus omnem lacrimam ab oculis eorum, et mors ultra non erit, neque luctus, neque clamor, neque dolor erit ultra, quia prima transierunt.

Collecta

Fidelium tuorum, Domine, suscipe vota, ut, quos permittis infantis sibi erepti desiderio deprimi, eosdem concedas in tuae spem miserationis fidenter attolli.
Vel: Scrutator cordium, Deus, et piissime consolator, qui horum parentum fidem novisti, praesta, ut infantem suum, quem plorant hac vita defunctum, tuae sentiant divinae pietati commissum.

Super Oblata

Hanc oblationem, Deus, dignare in nostrae signum devotionis excipere, ut, qui tuae providentiae consiliis submittimur confidentes, tuae quoque pietatis dulcedine sublevemur.

Ant. ad communionem

Praecipitabit Dominus mortem in sempiternum, et auferet Deus lacrimam ab omni facie.

Post communionem

Corporis, Domine, et Sanguinis Filii tui communione percepta, te fideliter deprecamur, ut, quos in spem vitae aeternae sacris dignatus es nutrire mysteriis, in huius tribuas vitae maeroribus confortari.
  In anniversario 

  A. Extra tempus Paschale

Ant. ad introitum

Absterget Deus omnem lacrimam ab oculis eorum, et mors ultra non erit, neque luctus, neque clamor, neque dolor erit ultra, quia prima transierunt.

Collecta

Deus, gloria fidelium et vita iustorum, cuius Filii morte et resurrectione redempti sumus, propitiare famulo tuo N., ut, qui resurrectionis nostrae mysterium agnovit, aeternae beatitudinis gaudia percipere mereatur.

Super Oblata

Munera, quaesumus, Domine, quae tibi pro anima famuli tui N. offerimus, placatus intende, ut, remediis purgata caelestibus, in tua gloria semper viva sit et beata.

Ant. ad communionem

Ego sum resurrectio et vita, dicit Dominus. Qui credit in me, habet vitam aeternam, et in iudicium non venit, sed transiet de morte ad vitam.

Post communionem

Sacris reparati mysteriis, te, Domine, suppliciter exoramus, ut famulus N., a delictis omnibus emundatus, aeterno resurrectionis munere ditari mereatur.

  B. Extra tempus Paschale

Ant. ad introitum

Domine Iesu, concede requiem aeternam eis, pro quibus tuum pretiosum effudisti sanguinem.

Collecta

Quaesumus, Domine, ut famulo tuo N., cuius corporis depositionis diem commemoramus, rorem misericordiae tuae perennem infundas, et Sanctorum tuorum largiri digneris consortium.

Super Oblata

Adesto, Domine, supplicationibus nostris pro famulo tuo N., cuius mortis hodie annua dies agitur, ut, per hoc sacrificium propitiationis et laudis, eum Sanctorum tuorum consortio sociare digneris.

Ant. ad communionem

Qui es, Domine, requies post laborem, qui es vita post mortem, tu dona eis requiem sempiternam.

Post communionem

Precibus nostris et sacrificiis, Domine, pro anima famuli tui N. benigne susceptis, te supplices deprecamur, ut, si quae ei maculae peccati adhaeserunt, remissionis tuae misericordia deleantur.

  C. Tempore Paschali

Ant. ad introitum

Deus, qui suscitavit Iesum a mortuis, vivificabit et mortalia corpora nostra, propter inhabitantem Spiritum eius in nobis, alleluia.

Collecta

Omnipotens et misericors Deus, cuius Filius voluntarie pro nobis carnis subiit mortem, concede propitius famulo tuo N. admirabili eius resurrectionis victoriae sociari.

Super Oblata

Omnipotens et misericors Deus, his sacrificiis ablue, quaesumus, animam famuli tui N. a peccatis suis in sanguine Christi, ut, quem aqua baptismatis mundasti, indesinenter purifices indulgentia pietatis.

Ant. ad communionem

Ego sum panis vivus, qui de caelo descendi, dicit Dominus. Si quis manducaverit ex hoc pane, vivet in aeternum; et panis, quem ego dabo, caro mea est pro mundi vita, alleluia.

Post communionem

Sumpto sacramento Unigeniti tui, qui pro nobis immolatus resurrexit in gloria, te, Domine, suppliciter exoramus pro famulo tuo N., ut, paschalibus mysteriis emundatus, futurae resurrectionis munere glorietur.

  D. Aliae orationes in Anniversario

Collecta

Concede, quaesumus, Domine, per beatam Filii tui passionem, famulo tuo N. remissionem, quam semper optavit, peccatorum, ut, te in veritate cognoscens, visione tua iugiter perfrui mereatur.

Super Oblata

Sacrificium tibi, Domine, pro famulo tuo N. suppliciter offerimus, ut, qui te iam dono tuae illuminationis agnovit, tibi adhaerere perpetuo laetetur.

Post communionem

Repleti alimonia reparationis et vitae, quaesumus, Domine, ut per eam frater noster N., ab omnibus peccatis emundatus, ad caeleste valeat transire consortium.

  E. Aliae orationes in Anniversario

Collecta

Deus indulgentiarum, da animae famuli tui N., cuius corporis anniversarium depositionis diem celebramus, refrigerii sedem, quietis beatitudinem et luminis claritatem.

Super Oblata

Supplicatio tibi nostra, Domine, et grata pariter exsistat oblatio, ut famulo tuo N., pro cuius salute defertur, plenitudinem tuae redemptionis acquirat.

Post communionem

Praesta, quaesumus, omnipotens Deus, ut anima famuli tui N., pro qua hoc sacrificium tuae obtulimus maiestati, per huius virtutem sacramenti a peccatis omnibus expiata, lucis perpetuae, te miserante, recipiat beatitudinem.
  In variis commemorationibus 

  A. Pro uno defuncto 1

Ant. ad introitum

Aperiat ei Dominus paradisi ianuam, ut ad illam patriam revertatur, ubi mors non est, ubi gaudium aeternum perseverat.

Collecta

Deus, Pater omnipotens, qui nos crucis mysterio confirmasti et Filii tui resurrectionis sacramento signasti, concede propitius famulo tuo N., ut, electorum tuorum aggregetur consortio.
Vel: Inclina, Domine, aurem tuam ad preces nostras, quibus misericordiam tuam supplices deprecamur, ut famulus tuus N., quem in hoc saeculo tuo populo misericorditer aggregasti, in pacis ac lucis regione constituas, et Sanctorum tuorum concedas esse consortem.

Super Oblata

Propitiare, quaesumus, Domine, famulo tuo N., pro quo hostiam tibi laudis immolamus, te suppliciter deprecantes, ut, per haec piae placationis officia, resurgere mereatur ad vitam.

Ant. ad communionem

Omne quod dat mihi Pater, ad me veniet, dicit Dominus, et eum qui venit ad me, non eiciam foras.

Post communionem

Vitalibus refecti sacramentis, quaesumus, Domine, ut anima fratris nostri N., quam testamenti tui participem effecisti, huius mysterii purificata virtute, in pace Christi sine fine laetetur. Qui vivit et regnat in saecula saeculorum.

  A. Pro uno defuncto 2

Ant. ad introitum

Scio quod Redemptor meus vivit, et in novissimo die de terra surrecturus sum, et in carne mea videbo Deum meum.

Collecta

Absolve, quaesumus, Domine, famulum tuum N. ab omni vinculo delictorum, ut, qui in hoc saeculo Christo meruit conformari, in resurrectionis gloria inter Sanctos tuos resuscitatus respiret.

Super Oblata

Annue nobis, quaesumus, Domine, ut famulo tuo N. haec prosit oblatio, quam immolando, totius mundi tribuisti relaxari delicta.

Ant. ad communionem

Hic est panis de caelo descendens, dicit Dominus; si quis ex ipso manducaverit, non morietur in aeternum.

Post communionem

Prosit, quaesumus, Domine, animae famuli tui N. sacrificium Ecclesiae tuae, ut, cum Sanctis tuis, Christi consortium inveniat, cuius misericordiae consecuta est sacramentum.

  A. Pro uno defuncto 3. Aliae orationes

Collecta

Deus, apud quem mortui vivunt et in quo Sancti tui plena felicitate laetantur, praesta supplicantibus nobis, ut famulus tuus N., qui nunc temporali huius mundi lumine caret, aeternae tuae lucis solatio perfruatur.

Super Oblata

Placeat tibi, Domine, sacrificii praesentis oblatio, ut anima famuli tui N., peccatorum veniam, quam quaesivit, te miserante inveniens, cum Sanctis tuis semper exsultet, et gloriam tuam in aeternum collaudet.

Post communionem

Sumentes dona caelestia, gratias tibi, Domine, referimus, humiliter deprecantes, ut anima famuli tui N., per Filii tui passionem a peccatorum vinculis absoluta, feliciter valeat ad te pervenire.

  A. Pro uno defuncto 4. Aliae orationes

Collecta

Ascendant ad te, Domine, preces nostrae, et animam famuli tui N. gaudia aeterna suscipiant, ut, quem ad imaginem tuam creare dignatus es et adoptionis participem fecisti, iubeas hereditatis tuae esse consortem.

Super Oblata

Oblationem nostram, quaesumus, Domine, quam pro anima famuli tui N. fidenter exhibemus, placatus accipias, ut ei per hoc sacrificium, quod cunctis esse remedium singulare voluisti, salutem tribuas sempiternam.

Post communionem

Recreati sacri muneris alimonia, quaesumus, Domine, ut frater noster N., mortis vinculis absolutus, resurrectionis Filii tui participatione laetetur.

  A. Pro uno defuncto 5. Aliae orationes

Collecta

Inclina, Domine, precibus nostris aures tuae pietatis, et animae famuli tui N. remissionem omnium tribue peccatorum, ut in resurrectionis die vivat, et in lucis amoenitate requiescat.

Super Oblata

Omnipotens sempiterne Deus, cuius Filius panem vitae nobis praebuit semetipsum, et sanguinem suum in poculum salutis effudit, miserere famuli tui N., ut, quod tibi offerimus, sit illi causa salutis.

Post communionem

Aeternae pignus vitae capientes, te, Domine, humiliter imploramus pro anima famuli tui N., ut, mortalibus nexibus expedita, redemptorum possit adunari consortio.

  B. Pro pluribus vel pro omnibus defunctis 1

Ant. ad introitum

Dona eis, Domine, requiem sempiternam et imple splendoribus animas eorum.

Collecta

Deus, qui Unigenitum tuum, devicta morte, ad caelestia transire fecisti, concede famulis tuis (N. et N.), ut, huius vitae mortalitate devicta, te conditorem et redemptorem possint perpetuo contemplari.

Super Oblata

Hostias, quaesumus, Domine, quas tibi pro animabus famulorum tuorum offerimus, propitiatus intende, ut, quibus fidei christianae meritum contulisti, dones et praemium.

Ant. ad communionem

Filium suum Unigenitum misit Deus in mundum, ut vivamus per eum.

Post communionem

Multiplica, Domine, his sacrificiis susceptis, super famulos tuos defunctos misericordiam tuam, et, quibus donasti baptismi gratiam, da eis aeternorum plenitudinem gaudiorum.

  B. Pro pluribus vel pro omnibus defunctis

Ant. ad introitum

Sic Deus dilexit mundum, ut Filium suum Unigenitum daret; ut omnis qui credit in ipsum, non pereat, sed habeat vitam aeternam.

Collecta

Omnipotens sempiterne Deus, vita mortalium et exsultatio Sanctorum, te supplices exoramus pro famulis tuis (N. et N.), ut, mortalitatis nexibus expediti, regnum tuum in gloria possideant sempiterna.

Super Oblata

Pro famulis tuis (N. et N.) et omnibus in Christo dormientibus hostiam, Domine, suscipe benignus oblatam, ut, per hoc sacrificium singulare vinculis mortis exuti, vitam mereantur aeternam.

Ant. ad communionem

Salvatorem exspectamus Dominum nostrum Iesum Christum, qui reformabit corpus humilitatis nostrae configuratum corpori claritatis suae.

Post communionem

Divina participantes mysteria, quaesumus, omnipotens Deus, ut haec eadem nobis proficiant ad salutem, et animabus famulorum tuorum, pro quibus tuam deprecamur clementiam, prosint ad veniam.

  B. Pro pluribus vel pro omnibus defunctis 3

Ant. ad introitum

Beati mortui, qui in Domino moriuntur. Amodo requiescant a laboribus suis: opera enim illorum sequuntur illos.

Collecta

Deus, cuius miseratione animae fidelium requiescunt, famulis tuis (N. et N.) et omnibus in Christo quiescentibus da propitius veniam peccatorum, ut, a cunctis reatibus absoluti, Christi tui resurrectioni socientur. Qui tecum.

Super Oblata

Munera, Domine, quaesumus, quae pro animarum famulorum tuorum requie offerimus, placatus intende, ut, per haec salutis humanae subsidia, tuorum numero redemptorum sorte perpetua censeantur.

Ant. ad communionem

Pro quorum memoria Corpus et Sanguis Christi sumitur, dona eis, Domine, requiem sempiternam.

Post communionem

Sumpsimus, Domine, redemptionis sacramenta, tuam clementiam obsecrantes, ut, te miserante, nobis viventibus tutelam, et nostris defunctis veniam sempiternam obtineant.

  B. Pro pluribus vel pro omnibus defunctis 4

Ant. ad introitum

In te, Domine, speravi, non confundar in aeternum; in iustitia tua libera me.

Collecta

Fidelium, Deus, omnium conditor et redemptor, famulis tuis remissionem cunctorum tribue peccatorum, ut indulgentiam, quam semper optaverunt, piis supplicationibus consequantur.

Super Oblata

Propitiare, quaesumus, Domine, famulis tuis (N. et N.) pro quibus tibi hostias placationis offerimus, et, quia in fide catholica in hac luce permanserunt, in futura vita eis retributio condonetur.

Ant. ad communionem

Ego sum lux mundi, dicit Dominus; qui sequitur me, non ambulat in tenebris, sed habebit lumen vitae.

Post communionem

Animabus famulorum tuorum, quaesumus, Domine, oratio proficiat supplicantium, ut eos, his sacrificiis, et a peccatis omnibus exuas, et aeternae salvationis facias esse participes.

  B. Pro pluribus vel pro omnibus defunctis 5

Ant. ad introitum

Laetetur cor quaerentium Dominum; quaeritis Dominum et confirmamini, quaerite faciem eius semper.

Collecta

Omnipotens sempiterne Deus, qui vivorum dominaris simul et mortuorum, omniumque misereris, te suppliciter exoramus, ut, pro quibus effundimus preces, pietatis tuae clementia delictorum suorum veniam consequantur, et de te beati congaudeant ac te sine fine collaudent.

Super Oblata

Huius sacrificii, Deus, oblatione suscepta, da famulis tuis (N. et N.) abundantiae Christi divitiarum esse participes, ut cum eodem Filio tuo resuscitari valeant et ad eius dexteram collocari.

Ant. ad communionem

Illumina faciem tuam super servum tuum, et salvum me fac in tua misericordia. Domine, non confundar, quoniam invocavi te.

Post communionem

Exaudi, Deus, tuos sacramento salutis filios enutritos, et, qui Christum Unigenitum tuum per Sanctum Spiritum e mortuis suscitasti, fidelibus tuis (N. et N.) immortalitatis et vitae concede laetitiam.

  B. Pro pluribus vel pro omnibus defunctis 6

Ant. ad introitum

Respice, Deus, in faciem Christi tui, quia melior est dies una in atriis tuis super millia.

Collecta

Quaesumus, Domine, famulis tuis defunctis misericordiam concede perpetuam, ut eis proficiat in aeternum quod in te speraverunt et crediderunt.

Super Oblata

Famulos tuos (N. et N.), Domine, ab omnibus vitiis condicionis humanae sacrificium hoc absolvat, quo peccata mundi abstulit universa Filius tuus pro nobis innocens immolatus.

Ant. ad communionem

Quemadmodum desiderat cervus ad fontes aquarum, ita desiderat anima mea ad te, Deus: sitivit anima mea ad Deum fortem vivum.

Post communionem

Inveniant, quaesumus, Domine, famuli tui, omnesque in Christo quiescentes, lucis aeternae consortium, qui, in hac luce positi, tuum consecuti sunt sacramentum.

  B. Pro pluribus vel pro omnibus defunctis 7. Aliae orationes

Collecta

Propitiare, Domine, famulis tuis (N. et N.), ut, quos regenerationis fonte mundasti, ad caelestis vitae beatitudinem facias pervenire.

Super Oblata

Pro famulis tuis (N. et N.), Domine, tibi sacrificium offerentes, supplices exoramus, ut ad tuam misericordiam illis conferendam perpetuam dignanter vota nostra perficias.

Post communionem

Sumptis, Domine, caelestibus sacramentis, tuam clementiam humiliter deprecamur, ut famuli tui, percipientes hoc munere veniam peccatorum, regnum tuum introire, teque in aeternum mereantur collaudare.

  B. Pro pluribus vel pro omnibus defunctis 8. Aliae orationes

Collecta

Tibi, Domine, commendamus famulos tuos (N. et N.), ut defuncti saeculo tibi vivant, et quae, per fragilitatem carnis, peccata in mundi conversatione commiserunt, tu venia misericordissimae pietatis absterge.

Super Oblata

Propitiare, quaesumus, Domine, famulis tuis (N. et N.), pro quibus tibi hostias placationis offerimus, et quia in hac vita tibi manserunt fideles, apud te pia illis retributio donetur.

Post communionem

Praesta, quaesumus, omnipotens Deus, ut famulos tuos, per huius sacramenti virtutem, in congregatione iustorum aeternae beatitudinis iubeas esse consortes.

  B. Pro pluribus vel pro omnibus defunctis 9. Aliae orationes

Collecta

Omnipotens sempiterne Deus, cui numquam sine spe misericordiae supplicatur, propitiare famulis tuis (N. et N.), ut, qui de hac vita in tui nominis confessione discesserunt, Sanctorum tuorum numero facias aggregari.

Super Oblata

Domine Deus, cuius Filius se tibi obtulit hostiam vivam, accipe, quaesumus, Ecclesiae tuae sacrificium, ut famuli tui (N. et N.), a peccatis omnibus absoluti, ad praemium immortalitatis mereantur pertingere.

Post communionem

Purificent nos, quaesumus, omnipotens et misericors Deus, sacramenta quae sumpsimus, et praesta, ut hoc sacrificium sit nobis intercessio ad veniam, sit fortitudo fragilium, sit in periculis firmamentum, sit vivis atque defunctis remissio omnium peccatorum, et pignus redemptionis aeternae.
  Orationes diversae pro defunctis 

  1. Pro Papa A

Collecta

Deus, fidelis remunerator animarum, praesta, ut defunctus famulus tuus Papa N., quem Petri constituisti successorem et Ecclesiae tuae pastorem, gratiae et miserationis tuae mysteriis, quae fidenter dispensavit in terris, laetanter apud te perpetuo fruatur in caelis.

Super Oblata

Quaesumus, Domine, ut, per haec piae placationis officia, animam famuli tui Papae N. beata retributio comitetur, et misericordia tua nobis gratiae dona conciliet.

Post communionem

Divinae tuae communionis refecti sacramentis, quaesumus, Domine, ut famulus tuus Papa N., quem Ecclesiae tuae visibile voluisti fundamentum unitatis in terris, beatitudini gregis tui feliciter aggregetur.

  IV. Orationes diversae pro defunctis. 1. Pro Papa B

Collecta

Deus, qui Ecclesiae tuae famulum tuum Papam N. ineffabili tua dispositione praeesse voluisti, praesta, quaesumus, ut, qui Filii tui vices gerebat in terris, ab ipso in gloria recipiatur aeterna.

Super Oblata

Munera, Domine, supplicantis Ecclesiae respice propitius, et, huius sacrificii virtute, concede, ut famulus tuus Papa N., quem sacerdotem magnum tuo gregi praefecisti, in electorum tuorum numero constituas sacerdotum.

Post communionem

Caritatis tuae, Domine, sumentes sacra subsidia, quaesumus, ut famulus tuus Papa N. misericordiam tuam in Sanctorum gloria perpetuo collaudet, qui fidelis exstitit mysteriorum tuorum dispensator in terris.

  IV. Orationes diversae pro defunctis. 1. Pro Papa C

Collecta

Deus, immortalis pastor animarum, respice populum supplicantem, et praesta, ut famulus tuus Papa N., qui Ecclesiae tuae in caritate praefuit, fidelis dispensatoris remunerationem cum grege sibi credito misericorditer consequatur.

Super Oblata

Oblationem pacificam populi tui, quaesumus, Domine, propitius intuere, qua animam famuli tui Papae N. tuae misericordiae fidenter committimus, et praesta, ut, quae tuae caritatis et pacis in humana familia fuit instrumentum, earum fructu cum Sanctis tuis perpetuo laetari mereatur.

Post communionem

Ad mensam aeterni accedentes convivii, misericordiam tuam, Domine, pro anima famuli tui Papae N. suppliciter imploramus, ut veritatis possessione tandem congaudeat, in qua populum tuum fidenter confirmavit.

  IV. Orationes diversae pro defunctis. 2. Pro Episcopo. A. Pro Episcopo dioecesano

Collecta

Da, quaesumus, omnipotens Deus, ut anima famuli tui N. episcopi, cui familiae tuae curam tradidisti, cum multiplici laboris fructu gaudia Domini sui ingrediatur aeterna.

Super Oblata

Immensam clementiam tuam, Domine, suppliciter imploramus, ut hoc sacrificium, quod famulus tuus N. episcopus, dum esset in corpore, maiestati tuae pro salute fidelium obtulit, ipsi nunc prosit ad veniam.

Post communionem

Prosit, quaesumus, Domine, animae famuli tui N. episcopi misericordiae tuae implorata clementia, ut Christi, in quo speravit et quem praedicavit, aeternum capiat, his sacrificiis, consortium.

  IV. Orationes diversae pro defunctis. 2. Pro Episcopo. B. Pro alio Episcopo

Collecta

Deus, qui inter apostolicos sacerdotes famulum tuum N. episcopum (cardinalem) pontificali fecisti dignitate vigere, praesta, quaesumus, ut eorum quoque perpetuo aggregetur consortio.

Super Oblata

Suscipe, Domine, quaesumus, pro anima famuli tui N. episcopi (cardinalis) quas tibi offerimus hostias, ut, cui in hoc saeculo pontificale donasti meritum, in caelesti regno Sanctorum tuorum iubeas iungi consortio.

Post communionem

Quaesumus, omnipotens et misericors Deus, ut famulum tuum N. episcopum (cardinalem), quem in terris pro Christo legatione fungi tribuisti, his emundatum sacrificiis, consedere facias in caelestibus cum ipso.

  IV. Orationes diversae pro defunctis. 3. Pro Sacerdote. A

Collecta

Praesta, quaesumus, Domine, ut anima famuli tui N. sacerdotis, quem in hoc saeculo commorantem sacris muneribus decorasti, in caelesti sede gloriosa semper exsultet.

Super Oblata

Concede, quaesumus, omnipotens Deus, ut famulus tuus N. sacerdos, per haec sancta mysteria, conspectu semper claro conspiciat quae hic fideliter ministravit.

Post communionem

Sumptis salutaribus sacramentis, imploramus, Deus, clementiam tuam, ut famulum tuum N. sacerdotem, quem fecisti mysteriorum tuorum dispensatorem in terris, eorum facias in caelis aperta veritate nutriri.

  IV. Orationes diversae pro defunctis. 3. Pro Sacerdote. B

Collecta

Preces nostras, quaesumus, Domine, quas pro animae famuli tui N. sacerdotis salute suppliciter deferimus, propitiatus exaudi, ut, qui nomini tuo ministerium fidele dependit, perpetua Sanctorum tuorum societate laetetur.

Super Oblata

Quaesumus, Domine, clementiam tuam, ut hoc sacrificium servitutis nostrae, pro anima famuli tui N. sacerdotis oblatum, ipsi nunc prosit ad veniam, quae illud in Ecclesia devota tibi mente exhibuit.

Post communionem

Mensae caelestis alimonia refecti, te, Domine, suppliciter exoramus, ut, huius virtute sacrificii, anima famuli tui N. sacerdotis ante conspectum tuum semper exsultet, qui in Ecclesia tua fideliter ministravit.

  IV. Orationes diversae pro defunctis. 4. Pro Diacono.

Collecta

Concede, quaesumus, misericors Deus, animae famuli tui N. diaconi felicitatis aeternae consortium, cui donasti in Ecclesia tua consequi ministerium.

Super Oblata

Propitiare, Domine, famulo tuo N. diacono, pro cuius salute hoc tibi sacrificium offerimus, ut, sicut Christo Filio tuo ministravit in carne, cum fidelibus servis exsurgat in gloriam sempiternam.

Post communionem

Muneribus sacris repleti, te, Domine, humiliter deprecamur, ut per hoc sacrificium famulum tuum N. diaconum, quem inter servos Ecclesiae tuae vocasti, a mortis vinculis absolutum, cum iis qui bene ministraverunt partem recipere et in gaudium tuum intrare benigne concedas.

  IV. Orationes diversae pro defunctis. 5. Pro Religioso.

Collecta

Praesta, quaesumus, omnipotens Deus, ut anima famuli tui N., qui pro Christi amore perfectae caritatis viam percurrit, in adventu gloriae tuae laetetur, et cum fratribus suis de regni tui beatitudine gaudeat sempiterna.

  IV. Orationes diversae pro defunctis. 6. Pro defuncto qui in servitio evangelii laboravit.

Collecta

Misericordiam tuam, Domine, pro famulo tuo N. supplices deprecamur, ut, qui pro Evangelio dilatando allaboravit assiduus, ad praemia regni mereatur intrare securus.

  IV. Orationes diversae pro defunctis. 7. Pro iuvene defuncto.

Collecta

Deus, qui omnium hominum vitam moderaris et tempora, hunc famulum tuum N., quem consummatum in brevi deflemus, tibi humiliter commendamus, ut in beatitudine domus tuae perenni facias iuventute vigere.

  IV. Orationes diversae pro defunctis. 8. Pro defuncto post longam infirmitatem consumpto.

Collecta

Deus, qui famulo tuo N. dedisti in aerumnis tibi et infirmitate servire, concede, quaesumus, ut, qui Filii tui secutus est patientiae documentum, eiusdem gloriae consequatur et praemium.

  IV. Orationes diversae pro defunctis. 9. Pro defuncto repentina morte sublato.

Collecta

Immensam, Domine, tuae bonitatis ostende virtutem, ut, qui fratrem nostrum N. repentina flemus morte sublatum, ad tuum confidamus transisse consortium.

  IV. Orationes diversae pro defunctis. 10. Pro coniugibus defunctis.

Collecta

Famulos tuos N. et N., quaesumus, Domine, miseratus absolve, ut, quos coniugalis amor in hac vita fideliter sociavit, in aeterna tuae caritatis plenitudo coniungat.
Vel: Famulum tuum (Famulam tuam) N., quaesumus, Domine, miseratus absolve, et famulam tuam (famulum tuum) N. continua pietate custodi, ut, quos coniugalis amor in hac vita fideliter sociavit, in aeterna tuae caritatis plenitudo coniungat.

  IV. Orationes diversae pro defunctis. 11. Pro parentibus.

Collecta

Deus, qui nos patrem et matrem honorare praecepisti, miserere clementer patri et matri meae (parentibus nostris), eorumque peccata dimitte, meque (nosque) eos in aeternae claritatis gaudio fac videre.

Super Oblata

Suscipe sacrificium, Domine, quod tibi pro patre et matre mea (parentibus nostris) offerimus eisque gaudium sempiternum in regione vivorum concede, meque (nosque) cum illis felicitati Sanctorum coniunge.

Post communionem

Caelestis participatio sacramenti, quaesumus, Domine, patri et matri meis (parentibus nostris) requiem et lucem obtineat perpetuam, meque (nosque) cum illis gloria tua satiet sempiterna.

  IV. Orationes diversae pro defunctis. 12. Pro defunctis fratibus, propinquis et benefactoribus.

Collecta

Deus, veniae largitor et humanae salutis amator, quaesumus clementiam tuam, ut nostrae congregationis fratres, propinquos et benefactores, qui ex hoc saeculo transierunt, beata Maria semper Virgine intercedente cum omnibus Sanctis tuis, ad perpetuae beatitudinis consortium pervenire concedas.

Super Oblata

Deus, cuius misericordiae non est numerus, suscipe propitius preces humilitatis nostrae, et animabus fratrum, propinquorum et benefactorum nostrorum, per haec sacramenta salutis nostrae, cunctorum remissionem tribue peccatorum.

Post communionem

Praesta, quaesumus, omnipotens et misericors Deus, ut animae fratrum, propinquorum et benefactorum nostrorum, pro quibus hoc sacrificium laudis tuae obtulimus maiestati, per huius virtutem sacramenti a peccatis omnibus expiatae, lucis perpetuae, te miserante, recipiant beatitudinem.