Dedicationis ecclesiae
Ant. ad introitum
Mirabilis, Deus, de sanctuario tuo! Deus Israel ipse tribuet virtutem et fortitudinem plebi suae. Benedictus Deus! (T.P. Alleluia).
Collecta
Deus, qui nobis per singulos annos huius sancti templi tui consecrationis reparas diem, exaudi preces populi tui, et praesta, ut fiat hic tibi semper purum servitium et nobis plena redemptio.
Super Oblata
Memores diei quo domum tuam, Domine, gloria dignatus es ac sanctitate replere, nosmetipsos, quaesumus, fac hostias tibi semper acceptas.
Ant. ad communionem
Templum Dei estis, et Spiritus Dei habitat in vobis. Templum Dei sanctum est, quod estis vos (T.P. Alleluia).
Post communionem
Benedictionis tuae, quaesumus, Domine, plebs tibi sacra fructus reportet et gaudium, ut, quod in huius festivitatis die corporali servitio exhibuit, spiritaliter se retulisse cognoscat.
Ant. ad introitum
Vidi civitatem sanctam, Ierusalem novam, descendentem de caelo a Deo, paratam sicut sponsam ornatam viro suo (T.P. Alleluia).
Collecta
Deus, qui de vivis et electis lapidibus aeternum habitaculum tuae praeparas maiestati, multiplica super Ecclesiam tuam gratiam, quam dedisti, ut fidelis tibi populus in caelestis aedificationem Ierusalem semper accrescat. Per Dominum.Deus, qui Ecclesiam tuam sponsam vocare dignatus es, da, ut plebs nomini tuo inserviens te timeat, te diligat, te sequatur et ad caelestia promissa, te ducente, perveniat. Per Dominum.
Super Oblata
Suscipe, quaesumus, Domine, munus oblatum, et poscentibus concede, ut hic sacramentorum virtus et votorum obtineatur effectus.
Ant. ad communionem
Tamquam lapides vivi superaedificamini, domus spiritalis, sacerdotium sanctum (T.P. Alleluia).
Post communionem
Deus, qui nobis supernam Ierusalem per temporale Ecclesiae tuae signum adumbrare voluisti, da, quaesumus, ut, huius participatione sacramenti, nos tuae gratiae templum efficias, et habitationem gloriae tuae ingredi concedas.
B. M. Virginis
Ant. ad introitum
Salve, sancta parens, enixa puerpera Regem, qui caelum terramque regit in saecula saeculorum.
Collecta
Concede nos famulos tuos, quaesumus, Domine Deus, perpetua mentis et corporis sanitate gaudere, et, gloriosa beatae Mariae semper Virginis intercessione, a praesenti liberari tristitia, et aeterna perfrui laetitia.
Super Oblata
Suscipe, quaesumus, Domine, preces populi tui cum oblationibus hostiarum, ut, intercedente beata Maria, Filii tui Genetrice, nullius sit irritum votum, nullius sit vacua postulatio.
Ant. ad communionem
Beata viscera Mariae Virginis, quae portaverunt aeterni Patris Filium.
Post communionem
Sumentes, Domine, caelestia sacramenta, quaesumus clementiam tuam, ut, qui de beatae Virginis Mariae commemoratione laetamur, eiusdem Virginis imitatione, redemptionis nostrae mysterio digne valeamus famulari.
Ant. ad introitum
Beata es, Virgo Maria, quae omnium portasti creatorem; genuisti qui te fecit, et in aeternum permanes Virgo.
Collecta
Concede, misericors Deus, fragilitati nostrae praesidium, ut, qui sanctae Dei Genetricis memoriam agimus, intercessionis eius auxilio a nostris iniquitatibus resurgamus.
Super Oblata
Genetricis Filii tui memoriam venerantes, quaesumus, Domine, ut sacrificii huius oblatio nosmetipsos, gratia tua largiente, tibi perficiat munus aeternum.
Ant. ad communionem
Fecit mihi magna, qui potens est, et sanctum nomen eius.
Post communionem
Redemptionis aeternae participes effecti, quaesumus, Domine, ut, qui Genetricis Filii tui memoriam agimus, et de gratiae tuae plenitudine gloriemur, et salvationis continuum sentiamus augmentum.
Ant. ad introitum
Benedicta es tu, Virgo Maria, a Domino Deo excelso prae omnibus mulieribus super terram; quia nomen tuum ita magnificavit, ut non recedat laus tua de ore hominum.
Collecta
Sanctissimae venerantibus Virginis Mariae memoriam gloriosam, ipsius nobis, quaesumus, Domine, intercessione concede, ut de plenitudine gratiae tuae nos quoque mereamur accipere.
Super Oblata
Laudis tibi, Domine, hostias offerimus, de Genetricis Filii tui commemoratione laetantes; praesta, quaesumus, ut per haec sacrosancta commercia ad redemptionis aeternae proficiamus augmentum.
Ant. ad communionem
Beatam me dicent omnes generationes, quia ancillam humilem respexit Deus.
Post communionem
Refecti, Domine, caelestibus alimoniis, te supplices exoramus, ut Filium tuum, ex alma Virgine natum, quem sacramento suscepimus, confiteamur verbis et moribus teneamus. Qui vivit et regnat in saecula saeculorum.
Ant. ad introitum
Sal 44, 13.15.16
Vultum tuum deprecabúntur omnes dívites plebis:
adducéntur Regi vírgines post eam:
próximae eius adducéntur tibi
in laetítia et exsultatióne.
Collecta
Famulórum tuórum, quaésumus, Dómine, delícta ignósce,
ut, qui tibi placére de áctibus nostris non valémus,
Genetrícis Fílii tui Dómini nostri intercessióne salvémur.
Qui tecum.
Super Oblata
Súscipe, Dómine, múnera quae tibi offérimus, et praésta,
ut corda nostra, Sancti Spíritus luce irradiáta,
exémplo beátae Vírginis Maríae,
tua semper váleant perquírere et conserváre.
Per Christum.
Ant. ad communionem
Laudáte Dóminum Deum nostrum,
quia in María ancílla sua
adimplévit misericórdiam suam,
quam promísit dómui Israel.
Post communionem
Sumptis, Dómine, salútis et fídei sacraméntis,
súpplices te deprecámur,
ut, beátam Vírginem Maríam devóte recoléntes,
supérnae caritátis cum ipsa partícipes fíeri mereámur.
Per Christum.
Ant. ad introitum
Cf. Lc 1, 28.42
Ave, María, grátia plena, Dóminus tecum:
benedícta tu in muliéribus,
et benedíctus fructus ventris tui.
Collecta
Deus, qui beátam Vírginem Maríam,
inter húmiles et páuperes praecelléntem,
Matrem Salvatóris elegísti,
praesta, quaésumus, ut, eius exémpla sectántes,
tibi sincérae fídei praestémus obséquium
et in te totam spem salútis collocémus.
Per Dóminum.
Super Oblata
Súscipe, Dómine, haec nóstrae devótionis múnera, et praesta,
ut, qui Fílii tui imménsae caritátis opus recólimus,
in tui et próximi dilectióne
beátae Maríae Vírginis confirmémur exémplo.
Per Christum.
Ant. ad communionem
Cf. Sal 86, 3; Lc 1, 49
Gloriósa dicta sunt de te, Virgo María,
quia fecit tibi magna, qui potens est.
Post communionem
Concéde, Dómine, Ecclésiae tuae,
ut, huius sacraménti virtúte roboráta,
sémitas Evangélii alácriter percúrrat,
donec beátam pacis visiónem attíngat,
qua Virgo María, húmilis ancílla tua,
iam frúitur in aetérnum gloriósa.
Per Christum.
Ant. ad introitum
Virga Iesse flóruit: Virgo Deum et hóminem génuit;
pacem Deus réddidit,
in se reconcílians ima summis.
Collecta
Adiuvet nos, quaésumus, Dómine,
beátae Maríae semper Vírginis intercéssio veneránda,
et a cunctis perículis absolútos
in tua fáciat pace gaudére.
Per Dóminum.
Super Oblata
Múnera tibi placatiónis et laudis offérimus, Dómine,
humíliter deprecántes,
ut, beátae Maríae Vírginis sequéntes exémpla,
nosmetípsos exhibeámus hóstiam sanctam, tibi placéntem.
Per Christum.
Ant. ad communionem
Sal 44, 3
Diffúsa est grátia in lábiis tuis:
proptérea benedíxit te Deus in aetérnum.
Post communionem
Caelésti alimónia nutrítos,
fac nos, Dómine, exémplo beátae Vírginis Maríae,
pura tibi conversatióne servíre,
et cum ipsa te sincéris láudibus magnificáre.
Per Christum.
Ant. ad introitum
Cf. Lc 1, 47-48
Ait María: Exsultávit spíritus meus in Deo salutári meo;
quia respéxit Dóminus humilitátem ancíllae suae.
Collecta
Deus, qui virginálem aulam beátae Maríae,
in qua Verbum tuum habitáret, elígere dignátus es,
da, quaésumus, ut, eius nos defensióne munítos,
iucúndos fácias interésse eius commemoratióni.
Per Dóminum.
Super Oblata
Accépta sint tibi, Dómine, múnera pópuli tui,
in commemoratióne beátae Maríae obláta,
quae tibi virginitáte plácuit
et humilitáte concépit Fílium tuum Dóminum nostrum.
Qui vivit et regnat in saécula saeculórum.
Ant. ad communionem
Lc 2, 19
María conservábat ómnia verba haec,
cónferens in corde suo.
Post communionem
Spirituális alimóniae partícipes effécti,
quaésumus, Dómine Deus noster,
ut, beátam Vírginem Maríam assídue imitántes,
et Ecclésiae servítio semper inveniámur inténti
et tui experiámur gáudia famulátus.
Per Christum.
Ant. ad introitum
Felix es, sacra Virgo María, et omni laude digníssima:
quia ex te ortus est sol iustítiae, Christus Deus noster,
per quem salváti et redémpti sumus.
Collecta
Concéde, quaésumus, omnípotens Deus, ut fidéles tui,
qui sub sanctíssimae Vírginis Maríae patrocínio laetántur,
eius pia intercessióne a cunctis malis liberéntur in terris,
et ad gáudia aetérna perveníre mereántur in caelis.
Per Dóminum.
Super Oblata
Preces, Dómine, tuórum réspice oblationésque fidélium,
in beátae Maríae Dei Genetrícis commemoratióne delátas,
ut et tibi gratae sint,
et nobis cónferant tuae propitiatiónis auxílium.
Per Christum.
Ant. ad communionem
Cf. Lc 1, 48
Respéxit Dóminus humilitátem ancíllae suae,
ecce enim beátam me dicent omnes generatiónes.
Post communionem
Salutáribus refécti sacraméntis,
súpplices te, Dómine, deprecámur,
ut, qui memóriam beátae Vírginis Dei Genetrícis Maríae
venerándo égimus,
redemptiónis tuae fructum perpétuo experíri mereámur.
Per Christum.
Ant. ad introitum
Rorate, caeli, desuper, et nubes pluant iustum; aperiatur terra, et germinet Salvatorem.Angelus ad Mariam ait: Invenisti gratiam apud Deum; Ecce concipies et paries filium, et vocabitur Altissimi Filius.
Collecta
Deus, qui de beatae Mariae Virginis utero Verbum tuum, Angelo nuntiante, carnem suscipere voluisti, praesta supplicibus tuis, ut, qui vere eam Dei Genetricem credimus, eius apud te intercessionibus adiuvemur.
Super Oblata
Accipe, Domine, haec munera, et tua virtute in sacramentum salutis converte, in quo, cessantibus figuralibus Patrum hostiis, verus Agnus offertur, Iesus Christus Filius tuus, ex intacta Virgine ineffabiliter natus.
Ant. ad communionem
Ecce Virgo concipiet, et pariet filium, et vocabitur nomen eius Emmanuel.
Post communionem
Mysteria quae sumpsimus, Domine Deus noster, misericordiam tuam in nobis semper ostendant, ut Filii tui incarnatione salvemur, qui Genetricis eius commemorationem fideli mente celebramus.
Ant. ad introitum
Genuit puerpera Regem, cui nomen aeternum, et gaudia matris habens cum virginitatis honore: nec primam similem visa est, nec habere sequentem.Virgo Dei Genetrix, quem totus non capit orbis, in tua se clausit viscera factus homo.
Collecta
Deus, qui salutis aeternae, beatae Mariae virginitate fecunda, humano generi praemia praestitisti, tribue, quaesumus, ut ipsam pro nobis intercedere sentiamus, per quam meruimus Filium tuum auctorem vitae suscipere, Dominum nostrum Iesum Christum, Filium tuum.Deus, cuius Verbum ab aeterno genitum ex Virginis utero procedere voluisti, concede, quaesumus, ut, beata Maria intercedente, splendore praesentiae suae nostras illuminet tenebras, ac de sua plenitudine donet nobis laetitiam et pacem. Qui tecum.
Ant. ad communionem
Beata viscera Mariae Virginis, quae portaverunt aeterni Patris Filium.
Post communionem
Incarnati Verbi tui Corpore et Sanguine refecti, quaesumus, Domine, ut haec divina mysteria, quae in commemoratione beatae Virginis Mariae laetanter accepimus, eiusdem Filii tui divinitatis participes nos semper efficiant.
Ant. ad introitum
Convertísti, Dómine, planctum meum in gáudium mihi, et circumdedísti me laetítia, allelúia.
Collecta
Deus, qui, per resurrectionem Filii tui Domini nostri Iesu Christi, mundum laetificare dignatus es, praesta, quaesumus, ut, per eius Genetricem Virginem Mariam, perpetuae capiamus gaudia vitae.
Super Oblata
Suscipe, sancte Pater, oblationem humilitatis nostrae, quam tibi laeti exhibemus, commemorationem beatae Mariae Virginis celebrantes, et praesta, ut nobis, sacrificio Christi sociatis, temporalis fiat consolatio et aeterna salvatio.
Ant. ad communionem
Laetare, Virgo Mater, quia surrexit Christus de sepulcro, alleluia.
Post communionem
Paschalibus sacramentis refecti, quaesumus, Domine, ut, qui Genetricis Filii tui memoriam recolimus, vitam Iesu in carne nostra mortali manifestemus.
Doctorum
Ant. ad introitum
In medio Ecclesiae aperuit os eius, et implevit eum Dominus spiritu sapientiae et intellectus; stolam gloriae induit eum (T.P. Alleluia). Os iusti meditabitur sapientiam, et lingua eius loquetur iudicium; lex Dei eius in corde ipsius (T.P. Alleluia).
Collecta
Omnipotens aeterne Deus, qui beatum N. (episcopum) Ecclesiae tuae doctorem dedisti, praesta, ut, quod ille divino affatus spiritu docuit, nostris iugiter stabiliatur in cordibus, et quem patronum, te donante, amplectimur, eum apud tuam misericordiam defensorem habeamus.
Super Oblata
Sacrificium tibi placeat, Deus, in festivitate beati N. libenter exhibitum, quo monente, nos etiam totos tibi reddimus collaudantes.
Ant. ad communionem
Fidelis servus et prudens, quem constituit Dominus super familiam suam, ut det illis in tempore tritici mensuram (T.P. Alleluia).Qui meditabitur in lege Domini die ac nocte, dabit fructum suum in tempore suo (T.P. Alleluia).
Post communionem
Quos Christo reficis pane vivo, eosdem edoce, Domine, Christo magistro, ut in festivitate beati N. tuam discant veritatem, et eam in caritate operentur.
Ant. ad introitum
Qui docti fuerint, fulgebunt quasi splendor firmamenti, et qui ad iustitiam erudiunt multos, quasi stellae in perpetuas aeternitates (T.P. Alleluia).Sapientiam Sanctorum narrent populi, et laudes eorum nuntiet Ecclesia; nomina autem eorum vivent in saeculum saeculi (T.P. Alleluia).
Collecta
Domine Deus, qui beatum N. caelesti doctrina imbuere dignatus es, da nobis, ipsius interventu, eandem doctrinam fideliter custodire et moribus profiteri.
Super Oblata
Illa nos, quaesumus, Domine, divina tractantes, Spiritus Sanctus fidei luce perfundat, qua beatum N. ad gloriae tuae propagationem iugiter collustravit.
Ant. ad communionem
Nos praedicamus Christum crucifixum, Christum, Dei virtutem et Dei sapientiam (T.P. Alleluia).
Post communionem
Caelesti alimonia refecti, supplices te, Domine, deprecamur, ut, beati N. monitis obsequentes, de acceptis donis semper in gratiarum actione maneamus.
Sanctorum
Ant. ad introitum
Confiteantur tibi, Domine, omnia opera tua, et Sancti tui benedicant tibi: gloriam regni tui dicent, et potentiam tuam loquentur (T.P. Alleluia).
Collecta
Omnipotens aeterne Deus, qui per glorificationem Sanctorum novissima dilectionis tuae nobis argumenta largiris, concede propitius, ut, ad Unigenitum tuum fideliter imitandum, et ipsorum intercessione commendemur, et incitemur exemplo.
Super Oblata
Preces nostras, Domine, quaesumus, propitiatus admitte, et, ut digne tuis famulemur altaribus, Sanctorum tuorum nos intercessione custodi.
Ant. ad communionem
Iusti epulentur, et exsultent in conspectu Dei, et delectentur in laetitia (T.P. Alleluia).Beati servi illi, quos, cum venerit Dominus, invenerit vigilantes. Amen dico vobis, quod praecinget se, et faciet illos discumbere, et transiens ministrabit illis (T.P. Alleluia).
Post communionem
Omnipotens sempiterne Deus, Pater totius consolationis et pacis, praesta familiae tuae in celebritate Sanctorum ad laudem tui nominis congregatae, ut, per Unigeniti tui sumpta mysteria, pignus accipiat redemptionis aeternae.
Ant. ad introitum
Laetabitur iustus in Domino, et sperabit in eo; et laudabuntur omnes recti corde (T.P. Alleluia).
Collecta
Deus, qui nos conspicis ex nostra infirmitate deficere, ad amorem tuum nos misericorditer per Sanctorum tuorum exempla restaura.
Super Oblata
Praesta nobis, quaesumus, omnipotens Deus, ut nostrae humilitatis oblatio et pro tuorum tibi grata sit honore Sanctorum, et nos corpore pariter et mente purificet.
Ant. ad communionem
Qui mihi ministrat, me sequatur, dicit Dominus: et ubi ego sum, illic et minister meus erit (T.P. Alleluia).
Post communionem
In nataliciis Sanctorum quaesumus, Domine, ut, sacramenti munere vegetati, bonis, quibus per tuam gratiam nunc fovemur, perfruamur aeternis.
Ant. ad introitum
Cf. Sal 91, 13-14
Iustus ut palma florébit,
sicut cedrus Líbani multiplicábitur;
plantátus in domo Dómini,
in átriis domus Dei nostri (T.P. Alleluia).
Collecta
Impetret, quaésumus, Dómine, fidélibus tuis auxílium
orátio iusta Sanctórum,
et, in quorum sunt celebritáte devóti,
fiant in eórum perpétua sorte partícipes.
Per Dóminum.
Super Oblata
Hóstias ad altáre tuum offeréntibus, Dómine,
da nobis illum pietátis afféctum, quem Sanctis tuis infudísti,
ut pura mente ac férvido corde rei sacrae attendámus,
et sacrifícium tibi plácitum nobísque profícuum celebrémus.
Per Christum.
Ant. ad communionem
Mt 11, 28
Veníte ad me, omnes qui laborátis et oneráti estis,
et ego refíciam vos, dicit Dóminus (T.P. Alleluia).
Post communionem
Sacramentórum tuórum, Dómine,
commúnio sumpta nos salvet,
et in tuae veritátis luce confírmet. Per Christum.
Ant. ad introitum
Jr 17, 7-8
Benedíctus vir, qui confídit in Dómino,
et erit Dóminus fidúcia eius;
et erit quasi lignum, quod transplantátur super aquas,
quod ad humórem mittit radíces suas;
et non timébit cum vénerit aestus (T.P. Alleluia).
Collecta
Concéde, quaésumus, omnípotens Deus,
ut ad meliórem vitam
Sanctórum tuórum exémpla nos próvocent,
quátenus beatórum N. et N., quorum memóriam celebrámus,
étiam actus incessánter imitémur. Per Dóminum.
Super Oblata
Múnera nostra, Dómine, sacris altáribus offeréntes,
in hac festivitáte Sanctórum tuórum,
quaésumus cleméntiam tuam,
ut éadem et suprémam tibi glóriam operéntur,
et ubérrimam nobis grátiam assequántur. Per Christum.
Ant. ad communionem
Jn 15, 9
Sicut diléxit me Pater, et ego diléxi vos, dicit Dóminus;
manéte in dilectióne mea (T.P. Alleluia).
Post communionem
Quaésumus, Dómine Deus noster, ut divína mystéria,
quae in tuórum commemoratióne Sanctórum frequentámus,
salútem et pacem in nobis operéntur aetérnam.
Per Christum.
Ant. ad introitum
In virtute tua, Domine, laetabitur iustus, et super salutare tuum exsultabit vehementer; desiderium animae eius tribuisti ei (T.P. Alleluia).
Collecta
Deus, qui infirmitati nostrae, ad terendam salutis viam, in Sanctis tuis exemplum et praesidium collocasti, concede propitius, ut, qui beati N. natalicia colimus, per eius ad te exempla gradiamur.
Super Oblata
Praesenti oblatione, Domine, in beati N. commemoratione delata, fidelibus tuis, quaesumus, pacis et unitatis dona largire.
Ant. ad communionem
Qui vult venire post me, abneget semetipsum, et tollat crucem suam, et sequatur me, dicit Dominus (T.P. Alleluia).Primum quaerite regnum Dei, et omnia adicientur vobis, dicit Dominus (T.P. Alleluia).
Post communionem
Sacramenta quae sumpsimus, Domine, in commemoratione beati N. mentes et corda nostra sanctificent, ut divinae consortes naturae effici mereamur.
Ant. ad introitum
Cf. Sal 63, 11
Laetábitur iustus in Dómino, et sperábit in eo;
et laudabúntur omnes recti corde (T.P. allelúia).
Collecta
Deus, qui nos cónspicis ex nostra infirmitáte defícere,
ad amórem tuum nos misericórditer
per Sanctórum tuórum exémpla restáura.
Per Dóminum.
Super Oblata
Praesta nobis, quaésumus, omnípotens Deus,
ut nostrae humilitátis oblátio
et pro tuórum tibi grata sit honóre Sanctórum,
et nos córpore páriter et mente puríficet. Per Christum.
Ant. ad communionem
Cf. Jn 12, 26
Qui mihi minístrat, me sequátur, dicit Dóminus:
et ubi ego sum, illic et miníster meus erit (T.P. Alleluia).
Post communionem
In natalíciis Sanctórum quaésumus, Dómine,
ut, sacraménti múnere vegetáti,
bonis, quibus per tuam grátiam nunc fovémur,
perfruámur aetérnis.
Per Christum.
Ant. ad introitum
Iustus ut palma florebit, sicut cedrus Libani multiplicabitur; plantatus in domo Domini, in atriis domus Dei nostri (T.P. Alleluia).
Collecta
Da nobis, quaesumus, Domine, inter mundi huius varietates toto corde rebus caelestibus adhaerere, qui per beatum N. abbatem evangelicae nobis perfectionis documenta donasti.
Super Oblata
Ad altare tuum accedentibus, Domine, da nobis illum pietatis affectum, quo beatus N., abbas, exarsit, ut, mundi corde et caritate ferventes, tibi sacrificium offerre valeamus.
Ant. ad communionem
Fidelis servus et prudens, quem constituit Dominus super familiam suam, ut det illis in tempore tritici mensuram (T.P. Alleluia).
Post communionem
Huius quod sumpsimus, Domine, virtute sacramenti, renova corda nostra, ut exemplo beati N., abbatis, quae sursum sunt, non quae super terram, sapientes, cum Christo in gloria mereamur apparere.
Ant. ad introitum
Ubi fratres in unum gloríficant Deum,
ibi dabit Dóminus benedictiónem (T.P. Alleluia).Cf. Sal 71, 8.23
Repleátur os meum laude tua, ut possim cantáre;
gaudébunt lábia mea, dum cantávero tibi (T.P. Alleluia).
Collecta
Deus, qui fámulum tuum beátum N.
ad Christi sequélam benígnus vocásti,
eius, quaésumus, intercessióne, concéde,
ut, nosmetípsos abnegántes,
tibi toto corde adhaerére valeámus.
Per Dóminum.
Super Oblata
Súscipe, Dómine, quaésumus,
hóstias pro salúte tuae plebis oblátas,
quibus nos, intercedénte beáto N.,
et peccándi illécebras fúgere valeámus
et caeléstibus propinquáre consórtiis.
Per Christum.
Ant. ad communionem
Cf. Lc 8, 15
Qui verbum Dei rétinent corde perfécto et óptimo,
fructum áfferunt in patiéntia (T.P. Alleluia). Cf. Sal 83, 5
Beáti qui hábitant in domo tua, Dómine,
in perpétuum laudábunt te (T.P. Alleluia).
Post communionem
Annue, quaésumus, Dómine, Deus noster,
ut, beáti N. fulti praesídio,
per hoc tuae sapiéntiae sacraméntum
aequa moderatióne vivámus. Per Christum.
Ant. ad introitum
Cf. Sal 51, 10
Ego autem sicut olíva fructífera in domo Dei,
sperávi in misericórdia Dei
in aetérnum et in saéculum saéculi (T.P. Alleluia).Regnum mundi et omnem ornátum saéculi contémpsi
propter amórem Dómini mei Iesu Christi,
quem vidi, quem amávi,
in quem crédidi, quem diléxi (T.P. Alleluia).
Collecta
Deus, qui ancíllam tuam beátam N.
ad quaeréndum te ante ómnia vocásti,
eius exemplo et intercessióne concéde,
ut, puro et húmili corde tibi serviéntes,
ad glóriam tuam perveniámus aetérnam.
Per Dóminum.
Super Oblata
Devotiónis nostrae múnera, Dómine,
in beátae N. commemoratióne
tibi sacránda deférimus,
qui temporáli consolatióne signíficas,
ut promíssanon desperémus aetérna. Per Christum.
Ant. ad communionem
Sal 44, 2
Eructávit cor meum verbum bonum,
dico ego ópera mea Regi (T.P. Alleluia).Lc 10, 42
Unum est necessárium:
óptimam partem elégit,
quae non auferétur ab ea (T.P. Alleluia).
Post communionem
Salutáribus, Dómine, fóntibus recreáti,
te súpplices exorámus,
ut, beátae N. intercessióne,
Christo in dies intímius adhaeréntes,
in eius regno grátiae mereámur esse consórtes.
Per Christum.
Ant. ad introitum
Dominus pars hereditatis meae et calicis mei: tu es qui restitues hereditatem meam mihi. Funes cecidérunt mihi in praecláris; étenim heréditas mea praeclára est mihi.(T.P. Alleluia).
Collecta
Deus, cuius munere beatus N. Christum pauperem et humilem perseveravit imitari, concede nobis, ipso intercedente, ut, in vocatione nostra fideliter ambulantes, ad eam perfectionem, quam nobis in Filio tuo proposuisti, pervenire valeamus.
Super Oblata
Clementissime Deus, qui, vetere homine consumpto, novum secundum te in beato N. creare dignatus es, concede propitius, ut nos pariter renovati hanc placationis hostiam tibi acceptabilem offeramus.
Ant. ad communionem
Amen dico vobis quod vos, qui reliquistis omnia, et secuti estis me, centuplum accipietis, et vitam aeternam possidebitis (T.P. Alleluia).
Post communionem
Per huius virtutem sacramenti, quaesumus, Domine, beati N. exemplo, deduc nos iugiter in tua dilectione, et opus bonum quod coepisti in nobis perfice usque in diem Christi Iesu. Qui vivit et regnat in saecula saeculorum.
Ant. ad introitum
Cf. Sal 23, 5-6
Isti sunt sancti, qui accepérunt benedictiónem a Dómino
et misericórdiam a Deo salutári suo,
quia haec est generátio quaeréntium Dóminum (T.P. Alleluia).Cf. Sal 104, 3-4
Laetétur cor quaeréntium Dóminum;
quaéritis Dóminum et confirmámini,
quaérite fáciem eius semper (T.P. Alleluia).
Collecta
Deus, qui beátum N.
ad tuum regnum in hoc saéculo perquiréndum,
per caritátis perféctae prosecutiónem vocásti,
concéde, ut, eius intercessióne roboráti,
in dilectiónis via spíritu gaudéntes progrediámur.
Per Dóminum.
Super Oblata
Accépta tibi sint, quaésumus, Dómine,
múnera nostrae servitútis
pro beáti N. commemoratióne altári tuo propósita,
et concéde, ut, a terrénis impediméntis absolúti,
te solo dívites efficiámur. Per Christum.
Ant. ad communionem
Sal 33, 9
Gustáte et vidéte quóniam suávis est Dóminus:
beátus vir, qui sperat in eo (T.P. Alleluia). Mt 5, 3
Beáti páuperes spíritu,
quóniam ipsórum est regnum caelórum (T.P. Alleluia).
Post communionem
Quaésumus, omnípotens Deus,
ut, qui huius sacraménti munímur virtúte,
exémplo beáti N., discámus te super ómnia semper inquírere,
et novi hóminis formam in hoc saéculo portáre. Per Christum.
Ant. ad introitum
Venite, benedicti Patris mei, dicit Dominus: infirmus eram, et visitastis me. Amen dico vobis, quamdiu fecistis uni ex his fratribus meis minimis, mihi fecistis (T.P. Alleluia).
Collecta
Deus, qui Ecclesiam tuam in dilectione tuae divinitatis et proximi cuncta servare caelestia mandata docuisti, da nobis, ut, beati N. exemplo caritatis opera exercentes, inter benedictos regni tui connumerari mereamur.
Super Oblata
Suscipe, Domine, munera populi tui, et praesta, ut, qui Filii tui immensae caritatis opus recolimus, in tui et proximi dilectione, beati N. exemplo, confirmemur.
Ant. ad communionem
Maiorem hac dilectionem nemo habet, ut animam suam ponat quis pro amicis suis (T.P. Alleluia).In hoc cognoscent omnes quia discipuli mei estis: si dilectionem habueritis ad invicem, dicit Dominus (T.P. Alleluia).
Post communionem
Sacris mysteriis refectos, da nos, quaesumus, Domine, beati N. exempla sectari, qui te indefessa pietate coluit, et populo tuo immensa profuit caritate.Sacramenti salutaris, Domine, pasti deliciis, tuam supplices deprecamur pietatem, ut, beati N. caritatis imitatores effecti, consortes simus et gloriae.
Ant. ad introitum
Sinite parvulos venire ad me, et ne prohibueritis eos: talium est enim regnum Dei, dicit Dominus (T.P. Alleluia).Qui fecerit et docuerit mandata Domini, hic magnus vocabitur in regno caelorum, dicit Dominus (T.P. Alleluia).
Collecta
Deus, qui in Ecclesia tua beatum N. suscitasti, ut proximis viam salutis monstraret, da nobis, eius exemplo, Christum magistrum ita sequi, ut ad te cum fratribus nostris pervenire valeamus.
Super Oblata
Accepta tibi sit, quaesumus, Domine, sacratae plebis oblatio pro beati commemoratione et praesta, ut, ex huius participatione mysterii, exempla tuae caritatis referamus.
Ant. ad communionem
Nisi conversi fueritis et efficiamini sicut parvuli, non intrabitis in regnum caelorum, dicit Dominus (T.P. Alleluia).Qui sequitur me, non ambulat in tenebris, sed habebit lumen vitae, dicit Dominus (T.P. Alleluia).
Post communionem
Tribuat nobis, omnipotens Deus, refectio sancta subsidium, ut, exemplo beati N., et fraternitatis caritatem et lumen veritatis in corde exhibeamus et opere.
Ant. ad introitum
Mulier timens Dominum ipsa laudabitur. Filii eius beatissimam praedicaverunt, vir eius laudavit eam (T.P. Alleluia).Manum suam aperuit inopi, et palmas suas extendit ad pauperem, et panem otiosa non comedit (T.P. Alleluia).
Collecta
Deus, qui nos annua beatae N. festivitate laetificas, da, quaesumus, ut, quam veneramur officio, etiam piae conversationis sequamur exemplo.Concede, quaesumus, omnipotens Deus, ut veneranda nobis beatarum N. et N. intercessio tribuat caeleste subsidium, quarum vita mirabilis omnibus salutare praestat exemplum.
Super Oblata
Hostias tibi, Domine, pro beatae N. commemoratione deferimus, suppliciter deprecantes, ut indulgentiam nobis pariter conferant et salutem.
Ant. ad communionem
Simile est regnum caelorum homini negotiatori quaerenti bonas margaritas; inventa autem una pretiosa margarita, dedit omnia sua, et comparavit eam (T.P. Alleluia).
Post communionem
Divini operatio sacramenti, omnipotens Deus, in hac festivitate beatae N. illuminet nos pariter et inflammet, ut et sanctis iugiter desideriis ferveamus, et bonis operibus abundemus.
Ant. ad introitum
Cf. Pr 14, 1-2
Ecce múlier sápiens, quae aedificávit domum suam,
et timens Dóminum ambulávit recto itínere (T.P. Alleluia).
Collecta
Deus, humílium celsitúdo,
qui beátam N. caritátis et patiéntiae décore
excéllere disposuísti,
eius méritis et intercessióne concéde,
ut, crucem nostram iúgiter feréntes,
te semper dilígere valeámus.
Per Dóminum. Effúnde super nos, Dómine,
spíritum agnitiónis et dilectiónis tuae,
quo ancíllam tuam beátam N. implevísti,
ut, sédula eius imitatióne tibi sincére obsequéntes,
fide et ópere placeámus.
Per Dóminum.
Super Oblata
Hóstias, Dómine, tuae plebis inténde,
et, quas in honóre beátae N. devóta mente célebrat,
profícere sibi séntiat ad salútem.
Per Christum.
Ant. ad communionem
Mt 12, 50
Quicúmque fécerit voluntátem Patris mei,
qui in caelis est, ipse meus frater et soror et mater est,
dicit Dóminus (T.P. Alleluia).
Post communionem
Repléti sumus, Dómine, munéribus tuis,
quae in celebritáte beátae N. percépimus;
tríbue, quaésumus,
ut eórum et mundémur efféctu, et muniámur auxílio.
Per Christum.
Martyrum
Ant. ad introitum
Gaudent in caelis animae Sanctorum, qui Christi vestigia sunt secuti; et quia pro eius amore sanguinem suum fuderunt, ideo cum Christo exsultant sine fine.
Collecta
Praesta, Domine, precibus nostris cum exsultatione proventum, ut sanctorum martyrum N. et N., quorum diem passionis annua devotione recolimus, etiam fidei constantiam subsequamur.
Super Oblata
Suscipe, sancte Pater, munera quae in sanctorum martyrum commemoratione deferimus, et nobis famulis tuis concede, ut in confessione tui nominis inveniri stabiles mereamur.
Ant. ad communionem
Vos estis qui permansistis mecum in tentationibus meis, et ego dispono vobis regnum, dicit Dominus, ut edatis et bibatis super mensam meam in regno meo.
Post communionem
Deus, qui crucis mysterium in sanctis martyribus tuis mirabiliter illustrasti, concede propitius, ut, ex hoc sacrificio roborati, Christo fideliter haereamus, et in Ecclesia ad salutem omnium operemur.
Ant. ad introitum
Multae tribulationes iustorum, et de his omnibus liberavit eos Dominus. Dominus custodit omnia ossa eorum, unum ex his non conteretur.
Collecta
Omnipotens sempiterne Deus, qui sanctis N. et N. pro Christo pati donasti, nostrae quoque fragilitati divinum praetende subsidium, ut sicut illi pro te mori non dubitarunt, ita nos fortes in tua confessione vivere valeamus.
Super Oblata
Fiat tibi, quaesumus, Domine, hostia sacranda placabilis pretiosi celebritate martyrii, quae et peccata nostra purificet, et tuorum tibi vota conciliet famulorum.
Ant. ad communionem
Maiorem caritatem nemo habet, ut animam suam ponat quis pro amicis suis, dicit Dominus.Dico autem vobis amicis meis: Ne terreamini ab his, qui vos persequuntur.
Post communionem
Pane caelesti nutritos et in Christo unum corpus effectos, da nos, quaesumus, Domine, ab eius caritate numquam separari et, sanctorum martyrum tuorum N. et N. exemplo, propter eum qui dilexit nos omnia fortiter superare.
Ant. ad introitum
Cf. Sal 37, 39
Salus iustórum a Dómino,
et protéctor eórum est in témpore tribulatiónis.Cf. Sb 3, 6-7.9
Tamquam aurum in fornáce probávit eléctos Dóminus,
et quasi holocáusti hóstiam accépit illos;
et in témpore erit respéctus illórum:
quóniam donum et pax erit eléctis Dei.
Collecta
Fratérna nos, Dómine,
mártyrum tuórum coróna laetíficet,
quae et fídei nostrae praébeat increménta virtútum,
et multíplici nos suffrágio consolétur.
Per Dóminum. Beatórum mártyrum N. et N., quaésumus, Dómine,
tibi nos orátio grata comméndet,
et in tuae veritátis professióne confírmet. Per Dóminum.
Super Oblata
Súscipe, quaésumus, Dómine, múnera pópuli tui
pro mártyrum tuórum passiónibus dicáta sanctórum,
et, quae beátis N. et N.
in persecutióne fortitúdinem ministrárunt,
nobis quoque praébeant inter advérsa constántiam.
Per Christum.
Ant. ad communionem
Maiorem caritatem nemo habet, ut animam suam ponat quis pro amicis suis, dicit Dominus.Dico autem vobis amicis meis: Ne terreamini ab his, qui vos persequuntur.
Post communionem
Cf. Mc 8, 35
Qui perdíderit ánimam suam
propter me et Evangélium,
salvam fáciet eam, dicit Dóminus.Cf. Sb 3, 4
Si coram homínibus torménta passi sunt,
spes electórum est immórtalis in aetérnum.
Ant. ad introitum
Cf. Sal 33, 18
Clamavérunt iusti, et Dóminus exaudívit eos,
et exómnibus tribulatiónibus eórum liberávit eos. Propter testaméntum Dómini et leges patérnas,
Sancti Dei perstitérunt in amóre fraternitátis:
quia unus fuit semper spíritus in eis, et una fides.
Collecta
Deus, qui nos ánnua sanctórum N. et N. festivitáte laetíficas,
concéde propítius, ut, quorum natalícia cólimus,
virtútem quoque passiónis imitémur.
Per Dóminum.Deus, qui sanctis N. et N.
ad hanc glóriam veniéndi copiósam munus grátiae contulísti,
da fámulis tuis, mártyrum intercedéntibus méritis,
véniam peccatórum,
et concéde, ut ab ómnibus adversitátibus liberéntur.
Per Dóminum.
Super Oblata
Hóstias tibi, Dómine,
pro commemoratióne beatórum N. et N. offérimus,
supplíciter deprecántes,
ut, sicut illis praebuísti sacrae fídei claritátem,
sic nobis indulgéntiam largiáris et pacem.
Per Christum.
Ant. ad communionem
2Co 4, 11
In mortem trádimur propter Iesum,
ut et vita Iesu manifestétur in carne nostra mortáli.Mt 10, 28
Nolíte timére eos qui corpus occídunt,
ánimam autem non possunt occídere, dicit Dóminus.
Post communionem
Concéde nobis, Dómine, per haec sacraménta caeléstia,
grátiam in beatórum mártyrum N. et N.
celebritáte multíplicem,
ut de tanti agóne certáminis discámus
et firma solidári patiéntia,
et pia exsultáre victória. Per Christum.
Ant. ad introitum
Sanguis sanctórum mártyrum
pro Christo effúsus est in terris;
ídeo adépti sunt praémia sempitérna.Cf. Sb 3, 1-2.3
Iustórum ánimae in manu Dei sunt:
et non tanget illos torméntum malítiae.
Visi sunt óculis insipiéntium mori:
illi autem sunt in pace.
Collecta
Da nobis, quaésumus, Dómine,
fídei miserátus augméntum,
ut, quae sanctos mártyres tuos N. et N.
usque ad sánguinem reténta gloríficat,
nos étiam iustíficet, veráciter hanc sequéntes.
Per Dóminum.
Super Oblata
Sacrifíciis praeséntibus, Dómine,
quaésumus, inténde placátus,
ut, quod passiónis Fílii tui mystério gérimus,
beatórum N. et N. exémplis, pio consequámur afféctu.
Per Christum. Haec hóstia, Dómine,
quam in beatórum N. et N. triúmpho deférimus,
corda nostra tui amóris igne iúgiter inflámmet,
et ad promíssa perseverántibus praémia dispónat.
Per Christum.
Ant. ad communionem
Maiorem caritatem nemo habet, ut animam suam ponat quis pro amicis suis, dicit Dominus.Dico autem vobis amicis meis: Ne terreamini ab his, qui vos persequuntur.
Post communionem
Cf. Rm 8, 38-39
Neque mors, neque vita,
nequecreatúra áliqua póterit nos separáre a caritáte Christi.Mt 10, 30.31
Vestri capílli cápitis omnes numeráti sunt;
nolíte timére: multis passéribus melióres estis vos.
Ant. ad introitum
Iste sanctus pro lege Dei sui certavit usque ad mortem, et a verbis impiorum non timuit; fundatus enim erat supra firmam petram.
Collecta
Omnipotens et misericors Deus, qui martyrem tuum beatum N. passionis suae tormenta superare fecisti, concede, ut, qui eius triumphi diem celebramus, insuperabiles tua protectione ab hostis insidiis maneamus.
Super Oblata
Oblata munera, quaesumus, Domine, tua benedictione sanctifica, quae, te donante, nos illa flamma tuae dilectionis accendat, per quam sanctus N. tormenta sui corporis universa devicit.Accepta tibi sint, quaesumus, Domine, munera, quae in commemoratione beati martyris tui N. deferimus, ut eo maiestati tuae sint placita, sicut illius effusio sanguinis apud te exstitit pretiosa.
Ant. ad communionem
Qui vult venire post me, abneget semetipsum, et tollat crucem suam, et sequatur me, dicit Dominus.Qui perdiderit animam suam propter me, dicit Dominus, inveniet eam in aeternum.
Post communionem
Praestent nobis, quaesumus, Domine, sacra mysteria quae sumpsimus eam animi fortitudinem, quae beatum N. martyrem tuum reddidit in tuo servitio fidelem et in passione victorem.
Ant. ad introitum
Hic est vere martyr, qui pro Christi nomine sanguinem suum fudit, qui minas iudicum non timuit, sed ad caelestia regna pervenit.
Collecta
Omnipotens sempiterne Deus, qui beato N. usque ad mortem pro iustitia certare tribuisti, fac nos, eius intercessione, pro amore tuo omnia adversa tolerare et ad te, qui solus es vita, tota virtute properare.
Super Oblata
Clementissime Deus, munera haec tua benedictione perfunde et nos in fide confirma, quam beatus N. effuso sanguine asseruit.Hostias tibi, Domine, pro commemoratione beati martyris tui N. offerimus, quem a Christi corporis unitate nulla tentatio separavit.
Ant. ad communionem
Ego sum vitis vera et vos palmites, dicit Dominus; qui manet in me et ego in eo, hic fert fructum multum.Qui sequitur me, non ambulat in tenebris, sed habebit lumen vitae, dicit Dominus.
Post communionem
Sacris, Domine, recreati mysteriis, quaesumus, ut, miram beati N. constantiam aemulantes, patientiae praemium consequi mereamur aeternum.
Ant. ad introitum
Ecce iam sequitur Agnum pro nobis crucifixum strenua virgo, pudoris hostia, victima castitatis (T.P. Alleluia).Beata virgo, quae abnegans semetipsam et tollens crucem suam, Dominum aemulata est, virginum sponsum martyrumque principem (T.P. Alleluia).
Collecta
Deus, qui nos hodie beatae N. annua commemoratione laetificas, concede propitius, ut eius adiuvemur meritis, cuius castitatis et fortitudinis irradiamur exemplis.
Super Oblata
Munera, quaesumus, Domine, quae in celebritate beatae N. deferimus, ita gratiae tuae efficiantur accepta, sicut eius tibi placitum exstitit passionis certamen.
Ant. ad communionem
Agnus, qui in medio throni est, deducet eos ad vitae fontes aquarum (T.P. Alleluia).
Post communionem
Deus, qui beatam N. pro gemina virginitatis et martyrii victoria inter Sanctos coronasti, da, quaesumus, per huius virtutem sacramenti, ut, omne malum fortiter superantes, caelestem gloriam consequamur.
Ant. ad introitum
Istarum est enim regnum caelorum quae contempserunt vitam mundi, et pervenerunt ad praemia regni et laverunt stolas suas in sanguine Agni (T.P. Alleluia).
Collecta
Deus, cuius munere virtus in infirmitate perficitur, da omnibus beatae N. gloriam recolentibus, ut, quae abs te sumpsit robur ut vinceret, abs te quoque vincendi nobis gratiam semper obtineat.
Super Oblata
Hodiernum, Domine, sacrificium laetanter offerimus, quo, beatae N. caelestem victoriam recensentes, et tua magnalia praedicamus, et nos acquisisse gaudemus suffragia gloriosa.
Ant. ad communionem
Non dilexerunt animas suas usque ad mortem, propterea laetamini, caeli, et qui habitatis in eo (T.P. Alleluia).
Post communionem
Sumentes, Domine, gaudia sempiterna de participatione sacramenti, et de memoria beatae N., suppliciter deprecamur, ut, quae sedula servitute, donante te, gerimus, dignis sensibus tuo munere capiamus.
Ant. ad introitum
Nobis absit gloriari nisi in cruce Domini nostri Iesu Christi. Verbum enim crucis nobis qui salvi facti sumus, virtus Dei est (T.P. Alleluia).
Collecta
Maiestatis tuae clementiam suppliciter deprecamur, omnipotens et misericors Deus, ut, sicut Unigeniti tui agnitionem per beatorum martyrum N. et N. praedicationem populorum cordibus infudisti, ita, eorum intercessione, fidei stabilitate firmentur.
Super Oblata
Martyrum tuorum N. et N. passionem venerantes, fac nos, Domine, hoc sacrificio mortem Unigeniti tui digne annuntiare, cui parum fuit hortari martyres verbo, nisi firmaret exemplo.
Ant. ad communionem
Beati qui persecutionem patiuntur propter iustitiam, quoniam ipsorum est regnum caelorum (T.P. Alleluia).
Qui me confessus fuerit coram hominibus, confitebor et ego eum coram Patre meo, dicit Dominus. (T.P. Alleluia).
Post communionem
Caelestibus, Domine, pasti deliciis, supplices te rogamus, ut, exemplo beatorum N. et N., caritatis et passionis Filii tui in mentibus nostris signa feramus, et perpetuae pacis fructu iugiter perfruamur.
Ant. ad introitum
Iste Sanctus propter opus Christi usque ad mortem accessit, in interitum tradens animam suam (T.P. Alleluia).
Collecta
Praesta, quaesumus, omnipotens Deus, ut beati N. fidem congrua devotione sectemur, qui pro eiusdem dilatatione coronam martyrii meruit.
Super Oblata
Beati N. martyrium recensentes, Domine, munera nostra ad altare tuum offerimus, deprecantes, ut, qui dominicae passionis mysteria celebramus, imitemur quod agimus.
Ant. ad communionem
Qui perdiderit animam suam propter me et propter Evangelium, dicit Dominus, salvam eam faciet (T.P. Alleluia).
Post communionem
Caeleste convivium celebrantes te, Domine, deprecamur, ut nos ad tantae fidei exempla sectanda beati N. martyris et recordatio incitet et oratio digna perducat.
Ant. ad introitum
Venite, benedicti Patris mei, percipite regnum, quod vobis paratum est ab origine mundi, alleluia.Isti, qui amicti sunt stolis albis, hi sunt qui venerunt ex magna tribulatione, et laverunt stolas suas in sanguine Agni, alleluia.
Collecta
Quaesumus, omnipotens Deus, ut nos, virtute Spiritus Sancti, et ad credendum dociles et ad confitendum fortes efficias, qui beatis martyribus N. et N. propter verbum tuum et testimonium Iesu animas ponere tribuisti.Deus, a quo constantiam fides, et virtutem sumit infirmitas, tribue nobis, martyrum N. et N. exemplo et precibus, in Unigeniti tui passione et resurrectione consortium, ut cum eis apud te gaudium perfectum consequamur.
Super Oblata
In tuorum, Domine, pretiosa morte iustorum, sacrificium illud offerimus, de quo martyrium sumpsit omne principium.
Ant. ad communionem
Vincenti dabo edere de ligno vitae, quod est in paradiso Dei mei, alleluia.
Post communionem
Beatorum martyrum N. et N. caelestem victoriam divino convivio celebrantes, te, Domine, deposcimus, ut panem vitae hic edentes des vincere, et vincentes des edere de ligno vitae in paradiso.
Ant. ad introitum
Isti sunt Sancti qui vicerunt propter sanguinem Agni, et non dilexerunt animas suas usque ad mortem; propterea cum Christo regnant in aeternum, alleluia.Gaudete, Sancti, ante conspectum Agni; paratum est vobis regnum ab origine mundi, alleluia.
Collecta
Laetificet nos, quaesumus, Domine, beatorum martyrum tuorum N. et N. gloriosa festivitas, quos, Unigeniti tui passionem et resurrectionem voce libera confitentes, pretiosum sanguinem gloriosa morte fundere fecisti.
Super Oblata
Praesentia munera, quaesumus, Domine, ita serena pietate intuere, ut Sancti Spiritus perfundantur benedictione, et in nostris cordibus eam dilectionem validam operentur, per quam sancti martyres N. et N. omnia corporis tormenta devicerunt.
Ant. ad communionem
Si commortui sumus cum Christo, et convivemus; si sustinemus, et conregnabimus, alleluia.Gaudete et exsultate, quoniam merces vestra copiosa est in caelis, alleluia.
Post communionem
Unius panis alimonia refecti, in commemoratione beatorum martyrum N. et N. suppliciter te, Domine, deprecamur, ut nos in tua iugiter caritate confirmes, et in novitate vitae concedas ambulare.
Ant. ad introitum
Lux perpetua lucebit Sanctis tuis, Domine, et aeternitas temporum, alleluia.
Collecta
Deus, qui ad illustrandam Ecclesiam tuam beatum N. martyrii victoria decorare dignatus es, concede propitius, ut, sicut ipse dominicae passionis imitator fuit, ita nos, per eius vestigia gradientes, ad gaudia sempiterna pervenire mereamur.
Super Oblata
Suscipe, Domine, sacrificium placationis et laudis, quod in commemoratione beati martyris N. tuae offerimus maiestati, ut nos perducat ad veniam, et in perpetua gratiarum constituat actione.
Ant. ad communionem
Nisi granum frumenti cadens in terram mortuum fuerit, ipsum solum manet; si autem mortuum fuerit, multum fructum affert, alleluia.
Post communionem
Tua, Domine, sumpsimus dona caelestia de hodierna festivitate laetantes; praesta, quaesumus, ut, qui in hoc divino convivio mortem Filii tui annuntiamus, eiusdem resurrectionis et gloriae cum sanctis martyribus participes esse mereamur.
Pastorum
Ant. ad introitum
Elegit eum Dominus sibi in sacerdotem magnum, et aperiens thesaurum suum abundare eum fecit omnibus bonis (T.P. Alleluia).
Collecta
Omnipotens sempiterne Deus, qui beatum N. cuncto populo tuo praeesse, ac verbo et exemplo prodesse voluisti, eodem intercedente, pastores Ecclesiae tuae cum gregibus sibi commissis custodi et dirige in viam salutis aeternae.Deus, qui Ecclesiae tuae in beato N. boni pastoris exemplum providere dignatus es, concede propitius, ut, eius intercessione, in loco pascuae tuae perpetuo collocari mereamur.
Super Oblata
Suscipe, quaesumus, Domine, hoc sacrificium populi tui, ut, quod tibi in honore beati N. offertur ad gloriam, nobis tribuas ad salutem perpetuam.
Ant. ad communionem
Pastor bonus animam suam posuit pro ovibus suis (T.P. Alleluia).
Post communionem
Sacramenta quae sumpsimus, Domine Deus noster, in nobis foveant caritatis ardorem, quo beatus N. vehementer accensus pro Ecclesia tua se iugiter impendebat.
Ant. ad introitum
Statuit ei Dominus testamentum pacis, et principem fecit eum, ut sit illi sacerdotii dignitas in aeternum (T.P. Alleluia).
Collecta
Deus, qui beatum N., quem totius Ecclesiae praestitisti esse pastorem, miro virtutis et doctrinae splendore coruscare fecisti, da nobis talis episcopi merita venerantibus, ut per bona opera lucere coram hominibus et per amorem ardere coram te valeamus. Deus, qui beatum N. vicarium constituisti Petri eique universae curam Ecclesiae commisisti, gregem tuum dilectum ipsius semper intercessione custodi, ut fide integra perfectaque ad patriam caritate procedat.
Da nobis, quaesumus, omnipotens Deus, beati N. episcopi digne memoriam venerari, et, sicut illum quibus praeerat, verbo et exemplo prodesse voluisti, ita ipsius apud te semper intercessionis suffragia sentiamus.
Super Oblata
Annue nobis, quaesumus, Domine, ut, in hac festivitate beati N., haec nobis prosit oblatio, quam immolando totius mundi tribuisti relaxari delicta.
Ant. ad communionem
Domine, tu omnia nosti; tu scis quia amo te (T.P. Alleluia).
Post communionem
Acceptorum munerum virtus, Domine Deus, in hac festivitate beati N. nobis effectus impleat, ut simul et mortalis vitae subsidium conferat, et gaudium perpetuae felicitatis obtineat.
Ant. ad introitum
Visitabo oves meas, dicit Dominus, et suscitabo pastorem qui pascat eas: ego autem Dominus ero eis in Deum (T.P. Alleluia).
Collecta
Omnipotens sempiterne Deus, qui beatum N. episcopum plebi tuae sanctae praeesse voluisti, quaesumus, ut, eius suffragantibus meritis, pietatis tuae gratiam largiaris.Omnipotens aeterne Deus, qui beatum N. episcopum Ecclesiae tuae sanctae dedisti, praesta, ut, quod ille divino affatus spiritu docuit, nostris iugiter stabiliatur in cordibus, et, quem patronum, te donante, amplectimur, eum apud tuam misericordiam defensorem habeamus.
Super Oblata
Hostias, quaesumus, Domine, quas in festivitate beati N. sacris altaribus exhibemus, propitius respice, ut, nobis indulgentiam largiendo, tuo nomini dent honorem.
Ant. ad communionem
Non vos me elegistis, dicit Dominus; sed ego elegi vos, et posui vos ut eatis et fructum afferatis, et fructus vester maneat (T.P. Alleluia).
Post communionem
Refecti sacris mysteriis, Domine, humiliter deprecamur, ut, beati N. exemplo, studeamus confiteri quod credidit, et opere exercere quod docuit.
Ant. ad introitum
Suscitábo mihi sacerdótem fidélem, qui iuxta cor meum et ánimam meam fáciet, dicit Dóminus (T.P. Alleluia).Fidélis et prudens dispensátor in magni patris famílias domo constitútus erat, ut consérvis suis mensúram trítici erogáret (T.P. Alleluia).
Collecta
Deus, qui beátum N. divína caritáte flagrántem, fidéque, quae vincit mundum, insígnem, sanctis pastóribus mirabíliter aggregásti, praesta, quaésumus, ut, ipso intercedénte, nos quoque, in fide et caritáte perseverántes, eius glóriae consórtes fíeri mereámur. Per Dóminum.Dómine Deus, qui beátum N. caelésti doctrína imbúere dignátus es, da nobis, ipsíus intervéntu, eándem doctrínam fidéliter custodíre, et móribus profitéri. Per Dóminum.
Super Oblata
Súscipe, Dómine, haec múnera pópuli tui, quae tibi in beáti N. festivitáte offérimus, ut per éadem, sicut confídimus, tuae pietátis sentiámus auxílium. Per Christum.
Ant. ad communionem
Ego veni ut vitam hábeant, et abundántius hábeant, dicit Dóminus (T.P. Alleluia).Signa eórum qui in me credunt, dicit Dóminus, haec sequéntur: daemónia eícient, super aegros manus impónent, et bene habébunt (T.P. Alleluia).
Post communionem
Córporis sacri et pretiósi Sánguinis alimónia repléti, quaésumus, Dómine Deus noster, ut, quod pia devotióne gérimus, certa redemptióne capiámus. Per Christum.
Ant. ad introitum
Dabo vobis pastores iuxta cor meum, et pascent vos scientia et doctrina (T.P. Alleluia).Sacerdotes Dei, benedicite Dominum; sancti et humiles corde, laudate Deum (T.P. Alleluia).
Collecta
Deus, qui beatos (episcopos) N. et N. ad pascendum populum tuum spiritu veritatis et dilectionis implevisti, praesta, ut, quorum festivitatem venerando agimus, eorum imitatione proficiamus, et intercessione sublevemur.
Super Oblata
Laudis tibi, Domine, hostias offerimus in tuorum commemoratione Sanctorum, quibus nos et praesentibus exui malis confidimus et futuris.
Ant. ad communionem
Filius hominis non venit ministrari, sed ministrare, et dare animam suam redemptionem pro multis (T.P. Alleluia).
Post communionem
Sumpsimus, Domine, sanctorum tuorum N. et N. memoriam celebrantes, sacramenta caelestia; praesta, quaesumus, ut, quod temporaliter gerimus, aeternis gaudiis consequamur.
Ant. ad introitum
Sacerdotes tui, Domine, induant iustitiam, et sancti tui exsultent (T.P. Alleluia).
Collecta
Supplices te rogamus, omnipotens Deus, ut, intercedente beato N. (episcopo), et tua in nobis dona multiplices, et tempora nostra in pace disponas.
Super Oblata
Praetende munera, quaesumus, Domine, altaribus tuis pro beati tui N. commemoratione proposita, ut, sicut per haec beata mysteria illo gloriam contulisti, ita nobis indulgentiam largiaris.
Ant. ad communionem
Beatus servus, quem, cum venerit Dominus, invenerit vigilantem; amen dico vobis, super omnia bona sua constituet eum (T.P. Alleluia).Fidelis servus et prudens, quem constituit Dominus super familiam suam, ut det illis in tempore tritici mensuram (T.P. Alleluia).
Post communionem
Mensa caelestis, omnipotens Deus, in omnibus festivitatem beati N. celebrantibus supernas vires firmet et augeat, ut et fidei donum integrum custodiamus, et per ostensum salutis tramitem ambulemus.
Ant. ad introitum
Spiritus Domini super me: propter quod unxit me, evangelizare pauperibus misit me, sanare contritos corde (T.P. Alleluia).
Collecta
Deus, fidelium lumen et pastor animarum, qui beatum N. (episcopum)in Ecclesia posuisti, ut oves tuas verbo pasceret et informaret exemplo, da nobis, eius intercessione, et fidem servare, quam verbo docuit, et viam sequi, quam exemplo monstravit.
Super Oblata
Maiestatem tuam suppliciter imploramus, omnipotens Deus, ut, sicut gloriam divinae potentiae munera pro beato N. oblata testantur, sic nobis effectum tuae salvationis impendant.
Ant. ad communionem
Ecce ego vobiscum sum omnibus diebus usque ad consummationem saeculi, dicit Dominus (T.P. Alleluia).
Post communionem
Sumpta mysteria, quaesumus, Domine, aeternis nos praeparent gaudiis, quae beatus N. fideli dispensatione promeruit. Refectione sacra enutritos, fac nos, omnipotens Deus, exempla beati N. iugiter sequentes, te perpeti devotione colere, et indefessa omnibus caritate proficere.
Ant. ad introitum
Dicit Dominus: Sermones mei, quos dedi in os tuum, non deficient de ore tuo, et munera tua accepta erunt super altare meum (T.P. Alleluia).
Collecta
Omnipotens et misericors Deus, qui beati N. praedicatione patres nostros illuminare dignatus es, concede nobis, quaesumus, ut, qui christiano gloriamur nomine, fidem quam profitemur iugiter operibus ostendamus. Respice, Domine, familiam tuam, quam beatus N. (episcopus)genuit verbo veritatis, et vitae aluit sacramento, ut, quos gratia tua fecit illius ministerio fideles, faciat eiusdem precibus in caritate ferventes.
Super Oblata
Annue, quaesumus, omnipotens Deus, ut haec sacrificia populi tui, quae tibi in commemoratione beati N. offerimus, donis caelestibus propitiatus immisceas.
Ant. ad communionem
Filius hominis venit, ut daret animam suam redemptionem pro multis (T.P. Alleluia).
Post communionem
Sumpsimus, Domine, pignus redemptionis aeternae, beati N. festivitate laetantes, quod sit nobis, quaesumus, vitae praesentis auxilium pariter et futurae.
Ant. ad introitum
Isti sunt viri sancti, quos elégit Dóminus in caritáte non ficta; et dedit illis glóriam sempitérnam, quorum doctrína fulget Ecclésia (T.P. Alleluia).
Collecta
Réspice, quaésumus, Dómine, ad tuam benígnus Ecclésiam et, cui per apostólicam sanctórum N. et N. sollicitúdinem religiónis exórdium donásti, per eórum intercessiónem, tríbue contínuum christiánae pietátis afféctum. Per Dóminum. Deus, qui beatórum N. et N. (episcopórum) praedicatióne patres nostros vocásti in admirábile Evangélii lumen, fac, ut, eórum intercessióne, crescámus in grátia et cognitióne Dómini nostri Iesu Christi, Fílii tui. Qui tecum.
Super Oblata
Súscipe, quaésumus, Dómine, múnera pópuli tui, pro sanctórum tuórum N. et N. festivitáte deláta, et sincéro nos corde pérfice benígnus accéptos. Per Christum.
Ant. ad communionem
Iam non dicam vos servos, quia servus nescit quid fáciat dóminus eius, dicit Dóminus. Vos autem dixi amícos, quia ómnia quaecúmque audívi a Patre meo, nota feci vobis (T.P. Alleluia).Pópulus acquisitiónis, annuntiáte virtútes eius, qui vos de ténebris vocávit in admirábile lumen suum (T.P. Alleluia).
Post communionem
Laetíficet nos accéptum de altári salutáre tuum, Dómine, in sanctórum N. et N. festivitáte, qua, de tuis benefíciis sollíciti, pretiósa fídei nostrae inítia venerámur, et te in sanctis tuis mirábilem praedicámus. Per Christum.
Ant. ad introitum
Isti sunt viri sancti facti amici Dei, divinae veritatis praeconio gloriosi (T.P. Alleluia).
Collecta
Deus, qui per beatum N. (episcopum) infideles populos de tenebris ad lucem veritatis venire tribuisti, da nobis, eius intercessione, in fidei stabilitate consistere, et in spe Evangelii, quod praedicavit, constantes permanere. Omnipotens sempiterne Deus, qui huius diei laetitiam in beati N. glorificatione consecrasti, concede propitius, ut fidem illam, quam inexplebili studio semper asseruit, iugiter retinere et opere complere studeamus.
Super Oblata
Respice quas offerimus hostias, omnipotens Deus, in beati N. festivitate, et praesta, ut, qui dominicae passionis mysteria celebramus, imitemur quod agimus.
Ant. ad communionem
Ego pascam oves meas, et ego eas accubare faciam, dicit Dominus (T.P. Alleluia).Quod dico vobis in ténebris, dícite in lúmine, dicit Dóminus, et quod in aure audítis, praedicáte super tecta (T.P. Alleluia).
Post communionem
Huius mysterii virtute, confirma, Domine, famulos tuos in fide veritatis, ut eam ubique ore et opere confiteantur, pro qua beatus N. laborare non destitit et vitam suam impendit.
Ant. ad introitum
Quam pulchri super montes pedes annuntiántis et praedicántis pacem, annuntiántis bonum, praedicántis salútem (T.P. Alleluia).
Collecta
Deus, qui Ecclésiam tuam beáti N. religiónis zelo et apostólicis curis amplificásti, eius intercessióne concéde, ut fídei et sanctitátis nova semper increménta suscípiat. Per Dóminum.
Super Oblata
Propitiáre, Dómine, supplicatiónibus nostris, et nos ab omni culpa líberos esse concéde, ut, purificánte grátia tua, iísdem quibus famulámur mystériis emundémur. Per Christum.
Ant. ad communionem
Eúntes in mundum univérsum, praedicáte Evangélium: ego vobíscum sum ómnibus diébus, dicit Dóminus (T.P. Alleluia).Manéte in me, et ego in vobis, dicit Dóminus. Qui manet in me et ego in eo, hic fert fructum multum (T.P. Alleluia).
Post communionem
Sacraménta quae súmpsimus, Dómine Deus noster, illam nobis fidem innútriant, quam et apostólica dócuit praedicátio, et beáti N. sollicitúdo custodívit. Per Christum.
Ant. ad introitum
Annuntiáte inter gentes glóriam Dómini, in ómnibus pópulis mirabília eius, quóniam magnus Dóminus et laudábilis nimis (T.P. Alleluia).
Collecta
Deus, cuius ineffábili misericórdia beátus N. evangelizávit investigábiles divítias Christi, da nos, eius intercessióne, créscere in sciéntia tua, et, in omni ópere bono fructificántes, secúndum Evangélii veritátem coram te fidéliter ambuláre. Per Dóminum.
Super Oblata
Beáti N. memóriam recenséntes, quaésumus, Dómine, ut his munéribus tibi oblátis benedictiónem effúndas de caelis, quo, ex eis suméntes, et ómnibus careámus culpis et caeléstibus repleámur edúliis. Per Christum.
Ant. ad communionem
Misit Dóminus discípulos, qui nuntiárent civitátibus: Appropinquávit in vos regnum Dei (T.P. Alleluia).Semen quod cécidit in terram bonam, hi sunt, qui in corde bono et óptimo fructum áfferunt in patiéntia (T.P. Alleluia).
Post communionem
Sancta tua nos, Dómine, sumpta vivíficent, ut, qui beáti N. commemoratióne gaudémus, eius quoque apostólicae virtútis proficiámus exémplo. Per Christum. Virginum
Ant. ad introitum
Virgines laudent nomen Domini, quia exaltatum est nomen eius solius; confessio eius super caelum et terram (T.P. Alleluia).
Collecta
Multiplica super nos, quaesumus, Domine, misericordiam tuam, ut, sicut in beatarum virginum N. et N. festivitate pia devotione laetamur, ita earum perpetua societate, te largiente, fruamur.
Super Oblata
In sanctarum virginum N. et N. commemoratione te, Domine, mirabilem praedicantes, munera votiva deferimus; praesta, quaesumus, ut, sicut earum tibi grata sunt merita, sic nostrae servitutis accepta reddantur officia.
Ant. ad communionem
Venit Sponsus, et virgines, quae paratae erant, intraverunt cum eo ad nuptias (T.P. Alleluia).
Post communionem
Sumpta mysteria, quaesumus, Domine, in hac festivitate beatarum virginum N. et N., incitent nos iugiter et illustrent, ut digne adventum Filii tui praestolemur, et ad supernas eius nuptias admittamur.
Ant. ad introitum
Haec est virgo sapiens, et una de numero prudentium, quae obviam Christo cum lampade accensa exiit (T.P. Alleluia).
Collecta
Exaudi nos, Deus, salutaris noster, ut, sicut de beatae N. virginis commemoratione gaudemus, ita piae devotionis erudiamur affectu.
Super Oblata
In beata virgine N. te, Domine, mirabilem praedicantes, maiestatem tuam suppliciter exoramus, ut, sicut eius tibi grata sunt merita, sic nostrae servitutis accepta reddantur officia.
Ant. ad communionem
Ecce Sponsus venit: exite obviam Christo Domino (T.P. Alleluia).
Post communionem
Divini muneris participatione refecti, quaesumus, Domine Deus noster, ut, exemplo beatae N., mortificationem Iesu in corpore nostro circumferentes, tibi soli adhaerere studeamus.
Ant. ad introitum
Gaudeamus et exsultemus, quia Dominus omnium dilexit virginem sanctam atque gloriosam (T.P. Alleluia). Haec est virgo sapiens, quam Dominus vigilantem invenit, quae acceptis lampadibus sumpsit secum oleum et, veniente Domino, introivit cum eo ad nuptias (T.P. Alleluia).
Collecta
Domine Deus, qui beatam N. virginem caelestibus donis cumulasti, tribue, quaesumus, ut, eius virtutes aemulantes in terris, gaudiis cum ipsa perfruamur aeternis. Fac, Domine Deus noster, ut beata virgo N., sponsa tibi fidelis, divinae caritatis flammam excitet in cordibus nostris, quam, ad perennem Ecclesiae tuae gloriam, aliis virginibus inseruit.
Super Oblata
Dicatae, quaesumus, Domine, capiamus oblationis effectum, ut, beatae N. exemplo, terrenae vetustatis conversatione mundati, caelestis vitae profectibus innovemur.
Ant. ad communionem
Quinque prudentes virgines acceperunt oleum in vasis suis cum lampadibus. Media autem nocte clamor factus est: Ecce sponsus venit, exite obviam Christo Domino (T.P. Alleluia).
Post communionem
Corporis et Sanguinis Unigeniti tui sacra perceptio, Domine, ab omnibus nos caducis rebus avertat, ut exemplo beatae N. valeamus tui et sincera in terris caritate proficere, et perpetua in caelis visione gaudere.
Ant. ad introitum
Veni, sponsa Christi, áccipe corónam,
quam tibi Dóminus praeparávit in aetérnum (T.P. Alleluia).Regnum mundi et omne saéculum contémpsit
propter amórem Dómini Iesu Christi (T.P. Alleluia).
Collecta
Deus, qui te in puris manére córdibus ásseris,
da nobis, beátae N. vírginis intercessióne,
per grátiam tuam tales exsístere,
in quibus habitáre dignéris.
Per Dóminum.Exáudi, quaésumus, Dómine, preces nostras,
ut, qui beátae N. vírginis virtútem devóte recólimus,
in tui amóre permanére
et usque in finem semper créscere mereámur.
Per Dóminum.
Super Oblata
Súscipe, Dómine, obséquium humilitátis nostrae,
quod tibi in commemoratióne beátae N. vírginis exhibémus,
et nos, per immaculátam hóstiam,
da iúgiter in tuo conspéctu pio sanctóque amóre flagráre.
Per Christum.
Ant. ad communionem
Cf. Lc 10, 42
Optimam partem elégit sibi virgo prudens,
quae non auferétur ab ea (T.P. Alleluia).Mt 25, 6
Média nocte clamor factus est:
Ecce sponsus venit, exíte óbviam ei (T.P. Alleluia).
Post communionem
Caelésti pane refécti,
humíliter deprecámur cleméntiam tuam, Dómine,
ut, qui de beátae N. commemoratióne gaudémus,
véniam delictórum, sospitátem córporum,
gratiámque et glóriam aetérnam consequámur animárum.
Per Christum.
Commune dedicationis ecclesiae. In aniversario dedicationis. I. In ipsa ecclesia dedicata