« Aliae orationes et piae exercitationes »

Deus meus et ómnia.
Benedícta sit Sancta Trínitas.
Dómine, salva nos, perímus!
Dóminus meus et Deus meus!
Deo omnis glória!
Ómnia in bonum!
Ecce ego, quia vocásti me!
In laetítia, nulla dies sine cruce!
Omnes cum Petro ad Iesum per Maríam!
Quia tu es, Deus, fortitúdo mea!
Credo, sed ádiuva incredulitátem meam!
Vultum tuum, Dómine, requíram!
Ut in gratiárum semper actióne maneámus!
Sancti Ángeli custódes nostri, deféndite nos!
Ure igne Sancti Spíritus!
Ómnia possum in eo, qui me confórtat.
Sancte Pater omnípotens, aetérne et miséricors Deus: beáta María intercedénte, grátias tibi ago pro univérsis benefíciis tuis, étiam ignótis.
Cor mundum crea in me, Deus!
Cor contrítum, et humiliátum, Deus non despícies!
Nunc cœpi!

Psalmi

Antiphona: Regnum eius regnum sempitérnum est, et omnes reges sérvient ei et obedient (T.P. Allelúia).
¹ Quare fremuérunt gentes, et pópuli meditáti sunt inánia?
² Astitérunt reges terrae, et príncipes convenérunt in unum advérsus Dóminum et advérsus Christum eius:
³ Dirumpámus víncula eórum et proiciámus a nobis iugum ipsórum!
⁴ Qui hábitat in caelis, irridebit eos, Dóminus subsannábit eos.
⁵ Tunc loquétur ad eos in ira sua et in furóre suo conturbábit eos:
⁶ Ego autem constítui regem meum super Sion, montem sanctum meum!
⁷ Praedicábo decrétum eius. Dóminus dixit ad me: Fílius meus es tu; ego hódie génui te.
⁸ Póstula a me, et dabo tibi gentes hereditátem tuam et possessiónem tuam términos terrae.
⁹ Reges eos in virga férrea et tamquam vas fíguli confrínges eos.
¹⁰ Et nunc, reges, intellégite, erudímini, qui iudicatis terram.
¹¹ Servíte Dómino in timore et exsultáte ei cum tremóre.
¹² Apprehéndite disciplinam, ne quando irascátur, et pereátis de via, cum exárserit in brevi ira eius. Beati omnes, qui confídunt in eo.

V/. Glória Patri, et Fílio, et Spirítui Sancto.
R/. Sicut erat in principio, et nunc, et semper, et in sáecula saeculórum. Amen.

Antiphona: Regnum eius regnum sempiternum est, et omnes reges sérvient ei et oboédient (T.P. Allelúia).

V/. Dómine, exaudi orationem meam.
R/. Et clamor meus ad te véniat.

Sacerdotes addunt:
V/. Dóminus vobíscum.
R/. Et cum spíritu tuo.

V/. Orémus: Omnípotens sempiterne Deus, qui in dilecto Fílio tuo, universorum Rege, ómnia instaurare voluisti: concéde propítius; ut cunctae famíliae géntium, peccati vúlnere disgregatae, eius suavíssimo subdantur império: Qui tecum vivit et regnat in unitate Spíritus Sancti Deus: per ómnia saécula saeculórum.
R/. Amen.

Psalmus L (Miserere)

Miserére mei, Deus, secúndum misericórdiam tuam. Et secúndum multitúdinem miseratiónum tuárum dele iniquitátem meam.

Amplius lava me ab iniquitáte mea et a peccáto meo munda me. Quóniam iniquitátem meam ego cognósco: et peccátum meum contra me est semper.

Tibi, tibi soli peccávi, et malum coram te feci, ut iustus inveniáris in senténtia tua et equus in iudício tuo. Ecce enim in iniquitáte generatus sum: et in peccáto concépit me mater mea.

Ecce enim veritátem in corde dilexísti: et in occúlto sapiéntiam manifestásti mihi. Aspérges me hyssópo, et mundábor: lavábis me, et super nivem dealbábor.

Audíre me fácies gáudium et letítiam, et exsultábunt ossa, quae contrivísti. Avérte fáciem tuam a peccátis meis et omnes iniquitátes meas dele.

Cor mundum crea in me, Deus, et spíritum firmum ínnova in viscéribus meis. Ne proícias me a fácie tua et spíritum sanctum tuum ne áuferas a me.

Redde mihi laetítiam salutáris tui et spíritu promptíssimo confirma me. Docébo iníquos vias tuas, et ímpii ad te converténtur.

Líbera me de sanguínibus, Deus, Deus salútis meae, et exsultábit língua mea iustítiam tuam. Dómine, lábia mea apéries, et os meum annuntiábit laudem tuam.

Non enim sacrifício delectáris; holocáustum, si ófferam, non placebit. Sacrifícium Deo spíritus contribulátus; cor contrítum, et humiliátum, Deus, non despícies.

Benígne fac, Dómine, in bona voluntáte tua Sion, ut aedificéntur muri Ierúsalem. Tunc acceptábis sacrifícium iustítiae, oblatiónes et holocáusta: tunc impónent super altáre tuum vítulos.

Psalmus LXII (Deus meus es tu)

Deus, Deus meus es tu, * ad te de luce vígilo. Sitívit in te ánima mea, * te desiderávit caro mea.

In terra desérta et árida et inaquósa, sic in sancto appárui tibi, * ut vidérem virtútem tuam et glóriam tuam.

Quóniam mélior est misericórdia tua super vitas, * lábia mea laudábunt te.

Sic benedícam te in vita mea * et in nómine tuo levábo manus meas.

Psalmus LXXXIII (Quam dilecta)

Quam dilécta tabernácula tua, Dómine virtútum! * Concupíscit et déficit ánima mea in átria Dómini.

Cor meum et caro mea * exultavérunt in Deum vivum.

Étenim passer invénit sibi domum, et turtur nidum sibi, ubi ponat pullos suos: * altária tua, Dómine virtútum, rex meus et Deus meus.

Beáti, qui hábitant in domo tua: * in perpétuum laudábunt te.

Beátus vir, cuius est auxílium abs te, * ascensiónes in corde suo dispósuit.

Transeúntes per vallem sitiéntem in fontem ponent eam, * étenim benedictiónibus véstiet eam plúvia matutína.

Ibunt de virtúte in virtútem, * vidébitur Deus deórum in Sion.

Dómine Deus virtútum, exáudi oratiónem meam; * áuribus pércipe Deus Iacob.

Protéctor noster áspice, Deus, * et réspice in fáciem Christi tui.

Quia mélior est dies una in átriis tuis super milia, elégi ad limen esse in domo Dei mei * magis quam habitáre in tabernáculis peccatórum.

Quia sol et scutum est Dóminus Deus, grátiam et glóriam dabit Dóminus; * non privábit bonis eos, qui ámbulant in innocentia.

Dómine virtútum, * beátus homo, qui sperat in te.

Psalmus LXXXIV (Complacuisti)

Complacuísti tibi, Dómine, in terra tua, * convertísti captivitátem Iacob.

Remisísti iniquitátem plebis tuae, * operuísti ómnia peccáta eórum.

Contraxísti omnem iram tuam, * revertísti a furóre indignatiónis tuae.

Convérte nos, Deus, salutáris noster, * et avérte iram tuam a nobis.

Numquid in aetérnum irascéris nobis * aut exténdes iram tuam a generatióne in generatiónem?

Nonne tu convérsus vivificábis nos, * et plebs tua laetábitur in te?

Osténde nobis, Dómine, misericórdiam tuam * et salutáre tuum da nobis.

Áudiam, quid loquátur Dóminus Deus, quóniam loquétur pacem ad plebem suam et sanctos suos * et ad eos, qui convertúntur corde.

Vere prope timéntes eum salutáre ipsíus; * ut inhábitet glória in terra nostra.

Misericórdia et véritas obviavérunt sibi; * iustítia et pax osculátae sunt. Véritas de terra orta est, * et iustítia de caelo prospéxit.

Étenim Dóminus dabit benignitátem, * et terra nostra dabit fructum suum.

Iustítia ante eum ambulábit, * et ponet in via gressus suos.

Psalmus LXXXIV (Inclina Domine)

Inclína, Dómine, aurem tuam et exáudi me, * quóniam inops et pauper sum ego.

Custódi ánimam meam, quóniam sanctus sum: * salvum fac servum tuum, Deus meus, sperántem in te.

Miserére mei, Dómine, * quóniam ad te, Dómine, clamávi tota die.

Laetífica ánimam servi tui, * quóniam ad te, Dómine, ánimam meam levávi.

Quóniam tu, Dómine, suávis et mitis, * et multae misericórdiae ómnibus invocántibus te.

Áuribus pércipe, Dómine, oratiónem meam, * et inténde voci deprecatiónis meae.

In die tribulatiónis meae clamávi ad te, * quia exáudies me.

Non est símilis tui in diis, Dómine, * et nihil sicut ópera tua.

Omnes gentes, quascúmque fecísti, vénient et adorábunt coram te, Domine, * et glorificábunt nomen tuum.

Quóniam magnus es tu et fáciens mirabília: * tu es Deus solus.

Doce me, Dómine, viam tuam, * et ingrédiar in veritáte tua;

simplex fac cor meum, ut tímeat nomen tuum.

Confitébor tibi, Dómine Deus meus, in toto corde meo * et glorificábo nomen tuum in aetérnum.

Quia misericórdia tua magna est super me, * et eruísti ánimam meam ex inférno inferióri.

Deus, supérbi insurrexérunt super me, et synagóga poténtium quaesiérunt ánimam meam * et non proposuérunt te in conspéctu suo.

Et tu, Dómine, Deus miserátor et miséricors, * pátiens et multae misericórdiae et veritátis.

Réspice in me et miserére mei; da fortitúdinem tuam púero tuo * et salvum fac fílium ancíllae tuae.

Fac mecum signum in bonum, ut vídeant, qui odérunt me, et confundántur, * quóniam tu, Dómine, adiuvísti me et consolátus es me.

Psalmus CXV (Credidi)

Crédidi, étiam cum locútus sum: * «Ego humiliátus sum nimis».

Ego dixi in trepidatióne mea: * «Omnis homo mendax».

Quid retríbuam Dómino * pro ómnibus, quae retríbuit mihi?

Cálicem salutáris accípiam * et nomen Dómini invocábo.

Vota mea Dómino reddam * coram omni pópulo eius.

Pretiósa in conspéctu Dómini * mors sanctórum eius.

O Dómine, ego servus tuus, * ego servus tuus et fílius ancíllae tuae.

Dirupísti víncula mea: * tibi sacrificábo hóstiam laudis * et nomen Dómini invocábo.

Vota mea Dómino reddam * coram omni pópulo eius,

In átriis domus Dómini, * in médio tui, Ierúsalem.

Psalmus CXXIX (De profundis)

De profúndis clamávi ad te, Dómine: Dómine, exáudi vocem meam: Fiant aures tuae intendéntes, in vocem deprecatiónis meae.

Si iniquitátes observáberis, Dómine: Dómine, quis sustinébit? Quia apud te propitiátio est: et propter legem team sustínui te, Dómine.

Sustínuit ánima mea in verbo eius: sperávit ánima mea in Dómino. A custódia matutína usque ad noctem: spéret Israël in Dómino.

Quia apud Dóminum misericórdia: et copiósa apud eum redémptio. Et ipse rédimet Israël, ex ómnibus iniquitátibus eius.

Cantica Sacrae Scripturae

Canticum Zachariae (Benedictus)

Benedíctus Dóminus, Deus Ísrael, quia visitábit et fecit redemptiónem plebi suae, et eréxit cornu salútis nobis in domo David puéri sui, sicut locútus est per os sanctorum, qui a saecula sunt, prophetárum eius, salútem ex inimícis nostris et de manu ómnium, qui odérunt nos;

ad faciéndam misericórdiam cum pátribus nostris et memorári testaménti sui sancti, iusiurándum, quod iurávit ad Ábraham patrem nostrum, datúrum se nobis, ut sine timóre, de manu inimicórum liberáti, serviámus illi in sanctitáte et iustítia coram ipso omnibus diébus nostris.

Et tu, puer, prophéta Altíssimi vocáberis: praeíbis enim ante fáciem Dómini paráre vias eius, ad dandam sciéntiam salútis plebi eius in remissiónem peccatórum eórum.

Per víscera misericórdiae Dei nostri, in quibus visitábit nos óriens ex alto, illumináre his, qui in ténebris et in umbra mortis sedent, ad dirigéndos pedes nostros in viam pacis.

Glória Patri, et Fílio, et Spirítui Sancto.

Sicut erat in princípio, et nunc et semper et in saecula saeculórum. Amen.

Canticum Simeonis (Nunc dimittis)

Nunc dimíttis servum tuum, Dómine, secúndum verbum tuum in pace.

Quia vidérunt óculi mei salutáre tuum, quod parásti ante fáciem ómnium populórum, lumen ad revelatiónem géntium et glóriam plebis tuae Israel.

Glória Patri...

Pro variis necessitatibus

Ad petendas vocationes

Dómine Iesu Christe, qui dixísti apóstolis tuis: messis quidem multa, operárii autem pauci: fac ut nos, tuo amóre flagrántes ac divínae glóriae stúdio permóti, a Dómino messis supplíciter impetrémus ut mittat operários in messem suam. Qui vivis et regnas cum Deo Patre, in unitáte Spíritus Sancti, Deus, per ómnia saecula saeculórum. Amen.

Vel (speciatim sacerdotales et religiosas):
Dómine Iesu Christe, Salvátor mundi, per Cor tuum dulcíssimum te supplíciter exorámus, ut gregem tuum, Pastor aetérne, in afflictióne sua non déseras, sed spíritum illum in eo resúscites, quem super Apóstolos tuos tam abúnde effudísti. Voca, quaesumus, quam plúrimos ad status sacerdotálem et religiósum, et quos elégeris tuae glóriae et salútis animárum zelus incéndat, virtus sanctíficet, Spíritus tuus contra advérsa ómnia confírmet. O Iesu, da nobis sacerdótes et religiósos secúndum Cor tuum. Amen.

Ad S. Ioannem Mariam Vianney Conf.

Parochorum Patronum

Omnípotens et miséricors Deus, qui sanctum Ioánnem Maríam pastoráli stúdio et iugi oratiónis ac paeniténtiae ardóre mirábilem effecísti: da, quaesumus; ut eius exémplo et intercessióne, ánimas fratrum lucrári Christo, et cum eis aetérnam glóriam cónsequi valeámus. Per eúndem Christum Dóminum nostrum. Amen.

Pro Episcopo

Stet et páscat in fortitúdine tua, Dómine, in sublimitáte nóminis tui. Amen.

Pro sacerdotibus

Iesu, Póntifex aetérne et divíne sacrificátor, qui singulári ímpetu amóris erga hómines, fratres tuos, impúlsus, e sacro Corde tuo christiánum sacerdótium effluére fecísti, ne desíeris sacerdótibus tuis vivíficos infiníti amóris torréntes benígnus infúndere.

In ipsis vívere velis eósque in te commutáre! Per grátiam tuam éffice eos minístros miseratiónum tuárum! Age in eis et per eos et fac, ut virtútes tuas venerándas fidéliter imitándo in omnibus te índuant tuóque nómine tuíque Spíritus virtúte operéntur, quae pro salúte mundi operátus es.

Réspice, divíne animárum Redémptor, quanta multitúdo eórum sit, qui adhuc in ténebris errórum dórmiunt; dinúmera, quot infidéles oves iuxta praecipítium ámbulent; consídera, quam multi sint páuperes, famélici, rudes, débiles in solitúdine geméntes!

Revértere ad nos per sacerdótes tuos; in eis vere resúrge! Per eósdem agens íterum per mundum transi docéndo, ignoscéndo, consolándo, sacrificándo atque sacráta víncula caritátis inter Cor divínum et corda hóminum renovándo. Amen.

Pro Summo Pontifice

Orémus pro Beatíssimo Papa nostro N.
Dóminus consérvet eum et vivíficet eum, et beátum fáciat eum in terra, et non tradat eum in ánimam inimicórum eius.

Pro tota Ecclesia

Deus, refúgium nostrum et virtus, pópulum ad te clamántem propítius réspice: et intercedénte gloriósa et immaculáta Vírgine Dei Genetríce María cum beáto Ioseph eius Sponso, ac beátis Apóstolis tuis Petro et Paulo et ómnibus Sanctis, quas pro conversione peccátorum, pro libertáte et exultatióne sanctae Matris Ecclésiae, preces effúndimus, miséricors et benígnus exáudi. Per eúndem Christum Dóminum nostrum. Amen.

Pro unitate Ecclesiae

Omnípotens et miséricors Deus, qui diversitátem géntium in unum pópulum per Fílium tuum adunáre voluísti, concéde propítius ut qui christiáno nómine gloriántur, quálibet divisióne reiécta, unum sint in veritáte et caritáte, et omnes hómines, verae fídei lúmine illustráti, in unam Ecclésiam fratérna communióne convéniant. Per Christum Dóminum nostrum. Amen.

Sero te amavi

(S. Augustinus, Conf. X, 27)

Sero te amávi, pulchritúdo tam antíqua et tam nova, sero te amávi! Et ecce intus eras et ego foris, et ibi te quaerébam, et in ista formósa, quae fecísti, defórmis inruébam. Mecum eras, et tecum non eram. Ea me tenébant longe a te, quae si in te non essent, non essent. Vocásti et clamásti et rupísti surditátem meam: coruscásti, splenduísti et fugásti caecitátem meam: fragrásti, et duxi spíritum, et anhélo tibi, gustávi et esúrio et sítio, tetigísti me, et exársi in pacem tuam.